തിരുവനന്തപുരം: സംസ്ഥാന സര്‍ക്കാരിന്റെ നേട്ടങ്ങള്‍ പ്രചരിപ്പിക്കാന്‍ പി.ആര്‍.ഡിക്ക് പുറമേ ദേശീയതലത്തില്‍ പ്രവര്‍ത്തിക്കുന്ന ഏജന്‍സിയെ കണ്ടെത്താന്‍ തീരുമാനം.
കൊവിഡിന്റെ പശ്ചാത്തലത്തില്‍ വന്‍ സാമ്പത്തിക പ്രതിസന്ധി നേരിടുമ്പോഴാണ് കൊവിഡ് കാലത്ത് സര്‍ക്കാരിന്റെ വികസന ക്ഷേമ പ്രവര്‍ത്തനങ്ങള്‍ സോഷ്യല്‍ മീഡിയ വഴി എത്തിക്കുന്നതിന് ഈ ധൂര്‍ത്ത് നടത്തുന്നത്. കഴിഞ്ഞ ദിവസം മുഖ്യമന്ത്രിയുടെ അധ്യക്ഷതയില്‍ ചേര്‍ന്ന യോഗത്തിലാണ് ഈ തീരുമാനമെടുത്തത്.
കണ്ടന്റുകളുടെ നിര്‍മാണം, രൂപകല്‍പ്പന, ഡിജിറ്റല്‍ പ്രമോഷന്‍ എന്നീ രംഗങ്ങളില്‍ വിദഗ്ധരായ ആളുകളുടേയും ക്രിയേറ്റീവ് ഏജന്‍സികളുടേയും പങ്കാളിത്തം, സോഷ്യല്‍ മീഡിയ ഔട്ട്‌റീച്ച്, മീഡിയ ട്രാക്കിങ്ങ് ആന്‍ഡ് റിപ്പോര്‍ട്ടിങ്ങ്, മീഡിയ റിലേഷന്‍സ് പ്രവര്‍ത്തനങ്ങള്‍, ഡിസൈനിങ്ങ് തുടങ്ങിയ പ്രവര്‍ത്തനങ്ങളുടെ സംഘാടനത്തിനും ഏകോപനത്തിനുമായാണ് ദേശീയ തലത്തില്‍ വൈദഗ്ധ്യവും അനുഭവസമ്പത്തുമുള്ള ഏജന്‍സികളെ കണ്ടെത്തുന്നതെന്നാണ് പി.ആര്‍.ഡിയുടെ ഉത്തരവില്‍ പറയുന്നത്.
ഏജന്‍സിയെ കണ്ടെത്താനായി പി.ആര്‍.ഡി സെക്രട്ടറി ചെയര്‍മാനും ഫിനാന്‍സ് സെക്രട്ടറി, ഐ.ടി. സെക്രട്ടറി, കിഫ്ബി സി.ഇ.ഒ എന്നിവര്‍ അംഗങ്ങളും പി.ആര്‍.ഡി ഡയറക്ടര്‍ കണ്‍വീറുമായ കമ്മറ്റി രൂപീകരിക്കാനും തീരുമാനിച്ചിട്ടുണ്ട്.