ഹൈദരാബാദ്: ആന്ധ്രാപ്രദേശ് മുന്‍ മുഖ്യമന്ത്രി എന്‍.ടി.രാമറാവുവിന്റെ മകനും മുന്‍ മന്ത്രിയും നടനുമായ നന്ദമുരി ഹരികൃഷ്ണയുടെ മൃതദേഹത്തിനൊപ്പം സെല്‍ഫിയെടുത്ത നാല് നഴ്‌സുമാരെ ആശുപത്രി മാനേജ്‌മെന്റ് പുറത്താക്കി. നല്‍ഗൊണ്ട കാമിനേനി സൂപ്പര്‍ സ്‌പെഷ്യാലിറ്റി ആശുപത്രി ജീവനക്കാരെയാണ് പുറത്താക്കിയത്. മൃതദേഹത്തോട് അനാദരവ് കാട്ടിയെന്ന് ചൂണ്ടിക്കാട്ടിയാണ് ഇവരെ ജോലിയില്‍ നിന്ന് പുറത്താക്കിയത്.

ഹരികൃഷ്ണയുടെ മൃതദേഹം പോസ്റ്റ്‌മോര്‍ട്ടത്തിന് എത്തിച്ചപ്പോഴാണ് നഴ്‌സുമാര്‍ സെല്‍ഫിയെടുത്തത്. മൃതദേഹത്തിനൊപ്പം ഇവരുടെ ചിരിച്ചുകൊണ്ടുള്ള ചിത്രം വാട്‌സ്ആപ്പിലൂടെ പ്രചരിച്ചതോടെ തെലങ്കാനയിലും ആന്ധ്രാപ്രദേശിലും വ്യാപക പ്രതിഷേധം ഉയര്‍ന്നു.

സംഭവം മെഡിക്കല്‍ രംഗത്തിന് അപമാനമുണ്ടാക്കുന്നതും, തികച്ചും നിര്‍ഭാഗ്യകരമായ സംഭവവുമാണെന്ന് ആശുപത്രി മാനേജ്‌മെന്റ് അറിയിച്ചു. സംഭവത്തില്‍ ഖേദം പ്രകടിപ്പിക്കുന്നതായും ഈ നാലുപേരെയും സര്‍വീസില്‍ നിന്ന് നീക്കിയതായും കാമിനേനി ആശുപത്രി പ്രതിനിധി അറിയിച്ചു.

ബുധനാഴ്ചയാണ് വാഹനാപകടത്തില്‍ ഹരികൃഷ്ണ മരിച്ചത്. ആന്ധ്രയിലെ നെല്ലൂരില്‍ വിവാഹച്ചടങ്ങില്‍ പങ്കെടുക്കാന്‍ പോകുന്നതിനിടെ കാര്‍ അപകടത്തില്‍ പെടുകയായിരുന്നു.