ബഹ്‌റൈനിലെ അംബാസഡറെ തിരിച്ചുവിളിച്ച് ഫലസ്തീന്‍
മനാമ: യു.എ.ഇയ്ക്കു പിന്നാലെ ഇസ്‌റാഈലുമായി നയതന്ത്രബന്ധം സ്ഥാപിക്കുന്ന രïാമത്തെ ഗള്‍ഫ് രാജ്യമായി ബഹ്‌റൈന്‍. ബഹ്‌റൈന്‍ രാജാവ് ഹമദ് ബിന്‍ ഈസയുമായും ഇസ്‌റാഈല്‍ പ്രധാനമന്ത്രി നെതന്യാഹുവുമായും ഫോണില്‍ സംസാരിച്ചശേഷം യു.എസ് പ്രസിഡന്റ് ഡൊണാള്‍ഡ് ട്രംപാണ് കരാര്‍ സംബന്ധിച്ച് വെള്ളിയാഴ്ച രാത്രി ട്വിറ്ററിലൂടെ പ്രഖ്യാപനം നടത്തിയത്.
ഇതൊരു ചരിത്ര ദിനമാണെന്ന് പ്രസ്താവിച്ച ട്രംപ് എന്നാല്‍ ഇത്ര പെട്ടെന്ന് ഇത് സാധ്യമാകുമെന്ന് പ്രതീക്ഷിച്ചിരുന്നില്ലെന്ന് മാധ്യമപ്രവര്‍ത്തകരോടു പറഞ്ഞു. ഇരു സമൂഹങ്ങളും തമ്മിലെ നേരിട്ടുള്ള ബന്ധത്തിനു തുടക്കമാവുന്നതോടെ മേഖലയിലെ സ്ഥിരതയും സുരക്ഷയും ക്ഷേമവും വര്‍ധിക്കുമെന്ന് യു.എസ്-ഇസ്‌റാഈല്‍-ബഹ്‌റൈന്‍ എന്നിവ സംയുക്ത പ്രസ്താവനയില്‍ പറഞ്ഞു. യു.എ.ഇ-ഇസ്‌റാഈല്‍ കരാര്‍ സ്ഥാപിച്ച് ഒരു മാസത്തിനകം ഗള്‍ഫിലെ മറ്റൊരു രാജ്യത്തെ കൂടി വലയില്‍ വീഴ്ത്താന്‍ സാധിച്ചത് നവംബര്‍ മൂന്നിന് നടക്കുന്ന തെരഞ്ഞെടുപ്പില്‍ ട്രംപിനു പിടിവള്ളിയായേക്കുമെന്നാണ് റിപ്പോര്‍ട്ട്. ഈജിപ്ത്, ജോര്‍ദാന്‍, യു.എ.ഇ എന്നിവയ്ക്കു ശേഷം ഇസ്‌റാഈലുമായി ബന്ധം സ്ഥാപിക്കുന്ന നാലാമത്തെ അറബ് രാജ്യമായി ബഹ്‌റൈന്‍.
സഊദിയും ബഹ്‌റൈനും നേരത്തെ ഇസ്‌റാഈലി വിമാനങ്ങള്‍ക്ക് വ്യോമപാത തുറന്നുനല്‍കിയിരുന്നു. യു.എ.ഇ-ഇസ്‌റാഈല്‍ കരാറിനെ അപലപിക്കുന്ന പ്രമേയം അറബ് ലീഗ് തള്ളിയതും ബഹ്‌റൈന്റെ സമ്മര്‍ദം മൂലമായിരുന്നു. കരാറിനെ സ്വാഗതം ചെയ്ത നെതന്യാഹു ട്രംപിന് നന്ദി അറിയിച്ചു. രാജ്യത്ത് സര്‍ക്കാര്‍ വിരുദ്ധ വികാരം ശക്തമായിരിക്കെ നെതന്യാഹുവിനും കരാര്‍ പ്രയോജനം ചെയ്യും. വൈറ്റ്ഹൗസ് ഉപദേഷ്ടാവ് ജാരെദ് കുഷ്‌നര്‍ സെപ്റ്റംബറില്‍ പശ്ചിമേഷ്യന്‍ രാജ്യങ്ങളില്‍ സന്ദര്‍ശനം നടത്തിയിരുന്നു.
ഫലസ്തീന്‍ അതോറിറ്റിയും ഹമാസും ബഹ്‌റൈന്റെ തീരുമാനത്തെ അപലപിച്ചു. ഫലസ്തീനികളുടെ സ്വപ്നം തകര്‍ക്കുന്നതും അധിനിവേശത്തിന് പിന്തുണ നല്‍കുന്നതുമാണിതെന്ന് ഹമാസ് വക്താവ് ഹാസിം ഖസ്സാം പറഞ്ഞു. സഊദിയുടെ മൗനാനുവാദത്തോടെയാണ് ബഹ്‌റൈന്‍ ഇതിനു സമ്മതിച്ചതെന്ന് വാഷിങ്ടണിലെ അറബ് സെന്റര്‍ എക്‌സിക്യൂട്ടീവ് ഡയരക്ടര്‍ ഖലീല്‍ ജഹ്ഷാന്‍ വ്യക്തമാക്കി. യു.എ.ഇ, ഈജിപ്ത് എന്നിവ കരാറിനെ സ്വാഗതം ചെയ്തപ്പോള്‍ ഇറാന്‍, തുര്‍ക്കി എന്നിവ അപലപിച്ചു.