മണ്ണുത്തി: കാര്‍ഷിക ഗവേഷണ കേന്ദ്രം മണ്ണുത്തിയുടെ കീഴിലുള്ള ഭക്ഷ്യ സുരക്ഷാ സേന ഗവേഷണ വികസന വിഭാഗം പുതിയതായി രൂപം കൊടുത്ത കുടുംബ പവര്‍ടില്ലറിന്റെ ആദ്യ പരിശോധന ഗവേഷണ കേന്ദ്രത്തില്‍ വിജയകരമായി നടന്നു. ഒന്‍പത് കുതിര ശക്തിയുള്ള ഒരു ചെറുകിട ടില്ലറില്‍ വിവിധയിനം കാര്‍ഷിക യന്ത്രങ്ങള്‍ ഘടിപ്പിക്കാവുന്ന രീതിയിലാണ് കുടുംബ ടില്ലര്‍ രൂപ കല്‍പന ചെയ്യ്തിട്ടുള്ളത്.
വാഴക്ക് കുഴി എടുക്കുക, തടം തുറക്കുക, തടം മൂടുക, വാഴകന്ന് പിഴുതെടുക്കുക, ചാലുകള്‍ കോരുക, വാരം കോരുക, മരുന്ന് തളിക്കുക, നിലം ഉഴുത് പാകപ്പെടുത്തുക ചെടികളില്‍ കമ്പ് കോതുന്നതിനുള്ള എലിവേറ്റര്‍ ഫ്‌ളാറ്റ്‌ഫോം എന്നീ വിവിധ പ്രവര്‍ത്തനങ്ങള്‍ ചെയ്യാവുന്ന രീതിയിലാണ് ഈ ടില്ലറിനെ ഒരുക്കുന്നത്. ടില്ലറിന്റെ പ്രവര്‍ത്തന ശക്തി ഉപയോഗിച്ച് ഹൈഡ്രോളിക്ക് മോട്ടോര്‍ സംവിധാനത്തിലൂടെയാണ് വിവിധ ഉപകരണങ്ങള്‍ പ്രവര്‍ത്തിപ്പിക്കുന്നത്.
ആദ്യഘട്ട പരീക്ഷണമായി കുഴിയെടുക്കുവാനുള്ള പോസ്റ്റ്‌ഹോള്‍ ഡിഗ്ഗറും, വാഴക്കന്ന് പിഴുതെടുക്കുന്നതിനുള്ള ഡീസക്കറിങ് സംവിധാനവും കാര്‍ഷിക ഗവേഷണ കേന്ദ്രത്തില്‍ പരിശോധിച്ചു. സാങ്കേതിക വിദ്യയായി അനുബന്ധ ഉപകരണങ്ങള്‍ക്ക് ആവശ്യമായ ശക്തി ലഭ്യമാക്കിയത് ഹൈഡ്രോളിക്ക് ദ്രാവക പ്രയോഗത്തിലൂടെയാണ്. ഇതിനായി വിവിധ ഹൈഡ്രോളിക്ക് ഉപകരണങ്ങള്‍ അനുയോജിപ്പിക്കുകയും ആവശ്യമായ നിയന്ത്രണങ്ങള്‍ സ്ഥാപിക്കുകയും ചെയ്തു. ഈ സങ്കേതത്തിന്റെ പ്രവര്‍ത്തന മേന്മ യാന്ത്രിക സിസ്റ്റത്തിനേക്കാളും കൂടുതലാണ് എന്ന് കാര്‍ഷിക ഗവേഷണ കേന്ദ്രം മേധാവി ഡോ.യു.ജയ്കുമാരന്‍ പറഞ്ഞു.
 ഓരോ അനുബന്ധ ഉപകരണങ്ങളും പ്രവര്‍ത്തിക്കുമ്പോള്‍ ഉണ്ടാകുന്ന പരമാവധി ഇന്ധനചെലവ് മണിക്കൂറില്‍ 1 ലിറ്റര്‍ മാത്രമാണ്. പ്രവര്‍ത്തനത്തിന്റെ അടിസ്ഥാനത്തില്‍ ഒരു മണിക്കൂറില്‍ 12 തൊട്ട് 15 കുഴികള്‍ വരെ നിര്‍മിക്കാമെന്ന് കണക്കു കൂട്ടുന്നു. ഇത്തരത്തിലാണെങ്കില്‍ ഒരു കുഴിക്ക് ചിലവ് ആറ് രൂപ മാത്രമേ വരുന്നുള്ളൂ. ആദ്യഘട്ട പരിശോധനയില്‍ അനുബന്ധ ഉപകരണങ്ങളുടെ പ്രവര്‍ത്തനം വിജയകരമായിരുന്നു.
ഏകദേശം ഒരു വര്‍ഷത്തില്‍ മറ്റുപകരണങ്ങള്‍ പൂര്‍ത്തിയാക്കുന്നതിനും ആവശ്യമായ പരിശോധനകള്‍ക്ക് ശേഷം നബാര്‍ഡിന് സമര്‍പ്പിക്കുന്നതുമാണ്. നബാര്‍ഡിന്റെ സാമ്പത്തിക സഹായത്തോടെ നടത്തുന്ന കുടുംബ ടില്ലര്‍ വികസനോദ്യമത്തിന് ഡോ. യു..ജയ്കുമാരന്‍, ഡോ. ലത, ഡോ. ഷൈല ജോസഫ്, ഡോ. പ്രേമന്‍, എജി. സിഞ്ചുരാജ്, സി.ഉണ്ണികൃഷ്ണന്‍, ജോസഫ് എന്നിവര്‍ ചേര്‍ന്ന ഗവേഷണ ടീം ആണ് നേതൃത്വം നല്‍കുന്നത്.