തിരുവനന്തപുരം: സംസ്ഥാനത്തിന്റെ പുനര്‍നിര്‍മാണത്തിനായി പദ്ധതി ആവിഷ്‌കരിച്ച് സഹകരണ വകുപ്പും. കെയര്‍ കേരള എന്ന പേരിലാണ് പദ്ധതി നടപ്പാക്കുന്നത്. പദ്ധതിയുടെ പ്രഖ്യാപനം മുഖ്യമന്ത്രി പിണറായി വിജയന്‍ നിര്‍വഹിച്ചു.
സഹകരണസംഘം രജിസ്ട്രാര്‍ക്ക് കീഴിലുള്ള 15,000ത്തിലധികം സംഘങ്ങളും ഫങ്ഷണല്‍ രജിസ്ട്രാര്‍മാര്‍ക്ക് കീഴിലുള്ള 7500ലധികം സംഘങ്ങളും പദ്ധതിയില്‍ പങ്കാളികളാകും. പ്രളയത്തില്‍ വീട് നഷ്ടപ്പെട്ടവര്‍ക്ക് പുതിയത് നിര്‍മിച്ചുനല്‍കുന്നതിനായി കെയര്‍ ഹോം പദ്ധതിയും നടപ്പാക്കും. ഇതില്‍ ഒന്നാംഘട്ടമായി 1500 കുടുംബങ്ങള്‍ക്ക് പുതിയ വീട് നിര്‍മിച്ചുനല്‍കും. ഒരു വീടിന് അഞ്ചുലക്ഷം രൂപ വീതം സഹായധനം നല്‍കും.
മൊത്തം പദ്ധതിച്ചെലവ് 75 കോടി രൂപയാണ്. വീടുകളുടെ നിര്‍മാണച്ചുമതല സ്ഥലത്തെ പ്രാഥമിക സംഘങ്ങള്‍ക്കോ മറ്റ് സഹകരണസംഘങ്ങള്‍ക്കോ ആയിരിക്കും. ദുരിതബാധിതര്‍ക്കായി കെയര്‍ ലോണ്‍ എന്ന പേരില്‍ വായ്പാ പദ്ധതിയും സഹകരണ വകുപ്പ് നടപ്പാക്കും.