തിരുവനന്തപുരം: എന്‍.ഡി.എ ഭരണത്തിനു കീഴില്‍ ഇന്ധനത്തിനൊഴിച്ചുള്ള വിലക്കയറ്റം പിടിച്ചുനിര്‍ത്താനായെന്നു ബി.ജെ.പി ദേശീയ ജനറല്‍ സെക്രട്ടറി പി. മുരളീധര റാവു. അന്താരാഷ്ട്ര തലത്തിലെ വിലക്കയറ്റമാണ് ഇന്ധന വിലയെ നിയന്ത്രിക്കുന്നതെന്നും ഇതില്‍ കേന്ദ്രസര്‍ക്കാരിനു പരിമിതികളുണ്ടെന്നും അദ്ദേഹം പറഞ്ഞു.
ആരോടും രാഷ്ട്രീയ അയിത്തമില്ലെന്ന നിലപാടുതന്നെയാണ് കേരളത്തിലും സ്വീകരിക്കുക. സംസ്ഥാനത്ത് എന്‍.ഡി.എ വിപുലപ്പെടുത്തും. ലോക്‌സഭാ തെരഞ്ഞെടുപ്പിനു മുന്‍പ് കേരളത്തിലെ പാര്‍ട്ടിയുടെയും മുന്നണിയുടെയും അടിത്തറ ശക്തമാക്കേണ്ടതുണ്ട്. ഇതിനായുള്ള കര്‍മപരിപാടി പാര്‍ട്ടി അധ്യക്ഷന്‍ തയാറാക്കിയിട്ടുണ്ട്. വര്‍ഷങ്ങള്‍ക്കു മുന്‍പു ബി.ജെ.പിയോട് പാര്‍ട്ടികള്‍ക്കു രാഷ്ട്രീയ അയിത്തമായിരുന്നു. ആ നിലപാട് ശരിയല്ലെന്നു കാലം തെളിയിച്ചെന്നും അദ്ദേഹം പറഞ്ഞു.
ബി.ഡി.ജെ.എസുമായി ബന്ധപ്പെട്ട ചോദ്യത്തിന് ഏതു ബന്ധമായാലും അതില്‍ സന്തോഷവും വേദനയുമുണ്ടാകുമെന്നും രാഷ്ട്രീയ കക്ഷികള്‍ തമ്മിലുള്ള ബന്ധത്തിലും അതു ബാധകമാണെന്നുമായിരുന്നു അദ്ദേഹത്തിന്റെ മറുപടി. പ്രളയത്തില്‍നിന്നു കേരളത്തെ കരകയറ്റാന്‍ കേന്ദ്രം ഒപ്പമുണ്ടാകും. ബി.ജെ.പി ഭരിക്കുന്ന സംസ്ഥാനങ്ങളെല്ലാം കേരളത്തെ സഹായിക്കുന്നുണ്ട്. മലയാളികള്‍ ആഗോളതലത്തില്‍ ജോലിയെടുക്കുന്നവരായതിനാല്‍ ഫണ്ട് പിരിവിനായി മന്ത്രിമാര്‍ വിദേശ രാജ്യങ്ങളിലേക്കു പോകുന്നതിനെ കുറ്റം പറയാനാകില്ലെന്നും മുരളീധര റാവു കൂട്ടിച്ചേര്‍ത്തു.