ഡെറാഡൂണ്‍: ഹിന്ദുമതത്തെ അപമാനിക്കുന്ന തരത്തിലുള്ള പ്രസ്താവന നടത്തിയെന്നാരോപിച്ച് സിപിഎം ജനറല്‍ സെക്രട്ടറി സീതാറാം യെച്ചൂരിക്കെതിരേ യോഗ ഗുരു ബാബ രാം ദേവ് പരാതി നല്‍കി. ഹരിദ്വാര്‍ പോലിസിലാണ് രാംദേവ് പരാതി നല്‍കിയത്. ഹിന്ദുമതത്തെ അക്രമവുമായി യെച്ചൂരി കൂട്ടിക്കെട്ടിയതായി രാംദേവിന്റെ പരാതിയില്‍ പറയുന്നു. മതത്തെ അപമാനിക്കാനുള്ള ശ്രമമാണ് യെച്ചൂരി നടത്തിയതെന്നും അത് അപലപനീയമാണെന്നും രാംദേവ് പറഞ്ഞു.

ഹിന്ദുക്കള്‍ക്ക് അക്രമങ്ങളില്‍ പങ്കാളിയാവാന്‍ കഴിയില്ലെന്ന ബിജെപി നേതാക്കളുടെ പ്രസ്താവനയ്ക്ക് മറുപടിയായി യെച്ചൂരി നടത്തിയ പരാമര്‍ശത്തിനെതിരേയാണ് രാംദേവ് പരാതിയുമായി മുന്നോട്ട് പോവുന്നത്. ഹിന്ദു പുരാണങ്ങളായ രാമായണവും മഹാഭാരതവുമെല്ലാം അക്രമങ്ങള്‍ വിവരിക്കുന്നവയാണെന്ന തരത്തിലായിരുന്നു യെച്ചൂരിയുടെ പരാമര്‍ശം.