റിയാദ്: സഊദിയില്‍ വിദേശികള്‍ക്ക് അനുവദിച്ച തൊഴില്‍വിസകളില്‍ വന്‍ ഇടിവ്. മുന്‍വര്‍ഷങ്ങളെ അപേക്ഷിച്ച് 65 ശതമാനമാണ് കുറഞ്ഞത്. രാജ്യത്ത് നടപ്പാക്കുന്ന സഊദിവല്‍ക്കരണവും സാമ്പത്തിക പരിഷ്‌കരണവുമാണ് ഇതിനുപിന്നില്‍. 

2015ല്‍ 20,31,291 വിസകള്‍ അനുവദിച്ചിരുന്ന സ്ഥാനത്ത് 2016ല്‍ 14,03,713 വിസകളും 2017ല്‍ 7,18,835 വിസകളുമാണ് തൊഴില്‍ സാമൂഹിക വികസന മന്ത്രാലയം അനുവദിച്ചത്. ഈ വര്‍ഷം ആദ്യ മൂന്നുമാസങ്ങളില്‍ അനുവദിച്ച 3,41,467 വിസകളില്‍ 64.8 ശതമാനവും ഗാര്‍ഹിക തൊഴിലാളി വിസകളാണ്. ഇതേ കാലയളവില്‍ സ്വകാര്യമേഖലയിലെ വിദേശ തൊഴിലാളികളുടെ എണ്ണത്തില്‍ 2,34,000ലേറെ പേരുടെ കുറവുണ്ടണ്ടായിട്ടുണ്ടണ്ട്. പ്രതിദിനം ശരാശരി 2,602 വിദേശികള്‍ക്ക് തൊഴില്‍ നഷ്ടപ്പെടുന്നതായാണ് കണക്ക്. അതേസമയം, ശക്തമായ സഊദിവല്‍ക്കരണം നടപ്പാക്കുമ്പോഴും സ്വദേശികള്‍ക്കിടയിലെ തൊഴിലില്ലായ്മ നിരക്ക് 12.9 ശതമാനമായി ഉയര്‍ന്നിട്ടുണ്ട്. സഊദിയിലെ 60 പിന്നിട്ട വിദേശ തൊഴിലാളികളുടെ കണക്കും പുറത്തുവന്നു.