കാസര്‍കോട്: പുതിയ ബസ് സ്റ്റാന്റിലെ പ്രവേശന കവാടത്തില്‍ ബസുകള്‍ കൂട്ടിയിടിച്ചു. കേരള-കര്‍ണാടക ആര്‍.ടി.സി ബസുകളാണു കൂട്ടിയിടിച്ചത്. കേരള ആര്‍.ടി.സി ബസിനകത്തുണ്ടായിരുന്ന പിഞ്ചു കുഞ്ഞിനു പരുക്കേറ്റു. ഇന്നലെ ഉച്ചയ്ക്ക് ഒന്നരയോടെയാണ് അപകടമുണ്ടായത്.
അമ്മയുടെ മടിയില്‍ മുന്‍വശത്തെ സീറ്റിലിരിക്കുകയായിരുന്ന പത്തു മാസം പ്രായമുള്ള കുഞ്ഞിനു ബസിന്റെ കമ്പിയില്‍ തട്ടിയാണ് നെറ്റിയില്‍ മുറിവേറ്റത്. കുഞ്ഞിനെ സ്വകാര്യാശുപത്രിയില്‍ പ്രവേശിപ്പിച്ചു. അപകട വിവരമറിഞ്ഞ് പൊലിസ് സ്ഥലത്തെത്തി. അപകടത്തില്‍ കര്‍ണാടക ട്രാന്‍സ്‌പോര്‍ട്ട് ബസിന്റെ മുന്‍ഭാഗവും കേരള ട്രാന്‍സ്‌പോര്‍ട്ട് ബസിന്റെ പിന്നിലെ ഗ്ലാസും തകര്‍ന്നു.