തിരുവനന്തപുരം: മുന്നണിയില്‍ ചര്‍ച്ച ചെയ്യാതെ എന്‍.സി.പി ഏകപക്ഷീയമായി മാണി സി. കാപ്പനെ പാലായില്‍ സ്ഥാനാര്‍ഥിയായി പ്രഖ്യാപിച്ചതില്‍ സി.പി.എമ്മിന് അതൃപ്തി. ഇതുസംബന്ധിച്ച് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനും എല്‍.ഡി.എഫ് കണ്‍വീനര്‍ എ.വിജയരാഘവനും എന്‍.സി.പി സംസ്ഥാന പ്രസിഡന്റ് തോമസ് ചാണ്ടിയെ നേരിട്ട് വിളിച്ച് അതൃപ്തി അറിയിച്ചു.
പാലായില്‍ ഉപതെരഞ്ഞെടുപ്പ് നടത്തുന്നത് സംബന്ധിച്ച് തെരഞ്ഞെടുപ്പ് കമ്മിഷന്‍ ആലോചനപോലും തുടങ്ങിയിട്ടില്ല. പിന്നെ എന്തിനാണ് പെട്ടെന്ന് സ്ഥാനാര്‍ഥിയെ പ്രഖ്യാപിച്ചതെന്ന് എല്‍.ഡി.എഫ് കണ്‍വീനര്‍ തോമസ് ചാണ്ടിയോട് ചോദിച്ചു. മുന്നണി മര്യാദ പാലിക്കണമെന്നും കണ്‍വീനര്‍ പറഞ്ഞു.
മാണി സി. കാപ്പനെ ചര്‍ച്ചകള്‍ നടത്താതെ ഏകപക്ഷീയമായി പ്രഖ്യാപിച്ചതില്‍ എന്‍.സി.പിക്കകത്തും വിവാദമായിട്ടുണ്ട്. സി.പി.എമ്മിന്റെ എതിര്‍പ്പുകൂടിയായപ്പോള്‍ സ്ഥാനാര്‍ഥിയെ പ്രഖ്യാപിച്ചിട്ടില്ലെന്നും അഭിപ്രായം പറയുക മാത്രമാണ് ചെയ്തതെന്നും വ്യക്തമാക്കി തോമസ് ചാണ്ടി പ്രസ്താവനയിറക്കി.
ദേശീയസമിതി അംഗം സുല്‍ഫിക്കര്‍ മയൂരിയുടെ അധ്യക്ഷതയില്‍ ചേര്‍ന്ന എന്‍.സി.പിയുടെ പാലാ ബ്ലോക്ക് കമ്മിറ്റി യോഗം മാണി സി. കാപ്പനെ ഏകകണ്ഠമായി സ്ഥാനാര്‍ഥിയായി നിശ്ചയിച്ചുവെന്നായിരുന്നു പ്രഖ്യാപനം. കേന്ദ്ര, സംസ്ഥാന നേതൃത്വങ്ങളുടെ നിര്‍ദേശമനുസരിച്ചാണ് പ്രഖ്യാപനമെന്ന് വിശദീകരിക്കുകയും ചെയ്തു.
പ്രഖ്യാപനം പുറത്തുവന്നതോടെ പാലായിലെ എന്‍.സി.പി നേതാക്കള്‍ തന്നെ തീരുമാനത്തിനെതിരേ രംഗത്തുവന്നു. ചിലരുടെ സ്ഥാപിത താല്‍പര്യമാണ് പ്രഖ്യാപനത്തിനുപിന്നിലെന്ന് ഒരുവിഭാഗം സംസ്ഥാന അധ്യക്ഷനോട് പരാതിപ്പെട്ടു.
പീതാംബരന്‍ മാസ്റ്റര്‍ ഉള്‍പ്പെടെയുള്ള മുതിര്‍ന്ന നേതാക്കളും അതൃപ്തി അറിയിച്ചു. തുടര്‍ന്നാണ് സ്ഥാനാര്‍ഥിയെ പ്രഖ്യാപിച്ചിട്ടില്ലെന്ന വിശദീകരണവുമായി തോമസ് ചാണ്ടി രംഗത്തുവന്നത്. സീറ്റ് സംബന്ധിച്ച് ഇടതുമുന്നണിയുമായി ചര്‍ച്ചപോലും നടത്തിയിട്ടില്ലെന്നും അതിനുശേഷമേ സ്ഥാനാര്‍ഥി നിര്‍ണയമുണ്ടാകൂവെന്നുമാണ് തോമസ് ചാണ്ടിയുടെ വിശദീകരണം.
സുല്‍ഫിക്കര്‍ മയൂരിക്ക് പ്രഖ്യാപനത്തിനുള്ള അധികാരമില്ലെന്നുപറഞ്ഞ് തീരുമാനത്തെ തോമസ്ചാണ്ടി പൂര്‍ണമായും തള്ളി. അതേസമയം, പാലാ സീറ്റ് ഏറ്റെടുക്കാന്‍ സി.പി.എമ്മില്‍ ആലോചനയുണ്ട്. മണ്ഡലത്തില്‍ സ്വാധീനമുള്ള സ്വതന്ത്രനെ പരീക്ഷിച്ച് പാല പിടിച്ചെടുക്കാനാണ് സി.പി.എം നീക്കം.