ഗൂഡല്ലൂര്‍: നീലഗിരി ജില്ലയിലെ ഗൂഡല്ലൂര്‍-പന്തല്ലൂര്‍ താലൂക്കുകളില്‍ റേഷന്‍ കടകളില്‍ എല്ലാ സാധനങ്ങളും കൃത്യമായി വിതരണം ചെയ്യുന്നില്ലെന്ന് പരാതി. അരി, ഗോതമ്പ്, പരിപ്പ്, പാംമോയില്‍, ഉഴുന്ന്, പഞ്ചസാര തുടങ്ങിയവയാണ് കൃത്യമായി വിതരണം ചെയ്യാത്തത്.
 മാസാദ്യത്തില്‍ വരുന്നവര്‍ക്ക് മാത്രമാണ് ഉഴുന്ന്, പരിപ്പ്, പാമോയില്‍ തുടങ്ങിയവ ലഭിക്കുന്നത്. അഞ്ചാം തിയതിക്ക് ശേഷം വരുന്നവര്‍ക്ക് പ്രസ്തുത സാധനങ്ങള്‍ ലഭിക്കുന്നില്ല. ജില്ലയില്‍ 2.25 ലക്ഷം റേഷന്‍ കാര്‍ഡുകളാണുള്ളത്. അരി, പരിപ്പ്, പഞ്ചസാര, ഉഴുന്ന്, പാമോയില്‍ തുടങ്ങിയവ സൗജന്യ നിരക്കിലാണ് വിതരണം ചെയ്യുന്നത്.
മാര്‍ക്കറ്റില്‍ ഇവക്ക് വന്‍ വിലയാണ്. അതുകൊണ്ട് തന്നെ സാധാരണക്കാരായ ജനങ്ങള്‍ക്ക് ഇവ പുറത്ത് നിന്ന് വാങ്ങാന്‍ പറ്റാത്ത സ്ഥിതിയാണുള്ളത്. എന്നാല്‍ ജില്ലയിലെ 80 ശതമാനം ജനങ്ങള്‍ക്കും റേഷന്‍കടകള്‍ക്ക് എല്ലാ സാധനങ്ങളും വിതരണം ചെയ്യുന്നുണ്ടെന്നാണ് ജില്ലാ കലക്ടര്‍ പി ശങ്കറും, ജില്ലാ സിവില്‍ സപ്ലൈസ് ഓഫിസര്‍ ജീവരത്‌നവും അറിയിച്ചു. റേഷന്‍ കടക്കാര്‍ റേഷന്‍ സാധനങ്ങള്‍ കരിചന്ത വഴി വില്‍പന നടത്തുന്നുണ്ടെന്ന് നാട്ടുകാര്‍ ആരോപിക്കുന്നു.