ആലപ്പുഴ: ജില്ലയിലെ ദുരിതാശ്വാസ പ്രവര്‍ത്തനങ്ങളില്‍ സര്‍ക്കാരിന്റെ ഭാഗത്തുനിന്ന് ഗുരുതരമായ വീഴ്ചയുണ്ടായതായി ആലപ്പുഴ ജില്ലാ കോണ്‍ഗ്രസ് നേതൃയോഗം വിലയിരുത്തി. ദുരിതാശ്വാസ പ്രവര്‍ത്തനങ്ങള്‍ ഏകോപിപ്പിച്ചപ്പോള്‍ പ്രതിപക്ഷ നേതാവ് രമേശ് ചെന്നിത്തല, ജില്ലയില്‍ നിന്നുള്ള എം.പിമാരായ കെ.സി വേണുഗോപാല്‍, കൊടിക്കുന്നില്‍ സുരേഷ് എന്നിവരെ ഉള്‍പ്പെടുത്തിയില്ല. ദുരിതാശ്വാസ ക്യാംപുകളില്‍നിന്ന് ജനങ്ങളെ ഒഴിപ്പിച്ചപ്പോള്‍ അവരുടെ പുനരധിവാസം ഉറപ്പാക്കാത്തതിനാല്‍ പല കുടുംബങ്ങളും പെരുവഴിയിലായി. വീടുകള്‍ പൂര്‍ണമായും നശിച്ചവരുടെ പുനരധിവാസത്തിനായി സര്‍ക്കാര്‍ ഇനിയും ക്രമീകരണങ്ങള്‍ ഏര്‍പ്പെടുത്തിയിട്ടില്ല.
ശുചിമുറികളുടെ പുനര്‍നിര്‍മാണത്തിന് സര്‍ക്കാര്‍ അനുവദിച്ചിരിക്കുന്ന 10,000 രൂപ തീര്‍ത്തും അപര്യാപ്തമാണ്. വീടുകളുടെ നാശനഷ്ടം എടുത്തപ്പോള്‍ ഗൃഹോപകരണങ്ങള്‍ ഉള്‍പ്പെടെയുള്ളവയുടെ നാശ നഷ്ടങ്ങള്‍ വിലയിരുത്താന്‍ സര്‍ക്കാര്‍ നിര്‍ദേശമുണ്ടായിട്ടില്ല. നാശനഷ്ടങ്ങളുടെ കണക്കില്‍ ഉപജീവന മാര്‍ഗത്തിനുള്ള സാധന സാമഗ്രികള്‍ ഉള്‍പ്പെടുത്തിയില്ല.
പാടശേഖരങ്ങളിലെ മടവീഴ്ച കാരണം വെള്ളംകെട്ടികിടക്കുന്നതിനാല്‍ ജനജീവിതം സാധാരണ നിലയിലാകാത്ത കൈനകരിപോലുള്ള പ്രദേശങ്ങളില്‍ മോട്ടോര്‍ പമ്പുകള്‍ എത്തിക്കുവാന്‍ കഴിഞ്ഞിട്ടില്ല. മടവീഴ്ചയുണ്ടായ പാടശേഖരങ്ങളില്‍ മടകുത്തുന്നതിനാവശ്യമായ തുക അനുവദിക്കാത്ത സര്‍ക്കാര്‍ മടകുത്തുന്നില്ല എന്ന കാരണം കണ്ടെത്തി പാടശേഖര സമിതികള്‍ക്കെതിരേ കേസെടുക്കുമെന്ന ഭീഷണി സര്‍ക്കാരിന്റെ ധാര്‍ഷ്ട്യമാണെന്ന് യോഗം കുറ്റപ്പെടുത്തി. കുട്ടനാട്ടിലാകമാനം രൂക്ഷമായ കുടിവെള്ള ക്ഷാമം പരിഹരിക്കുവാന്‍ പ്രതിദിനം 25 ലിറ്റര്‍ വെള്ളമെങ്കിലും ഒരു കുടുംബത്തിന് വിതരണം ചെയ്യാന്‍ സര്‍ക്കാര്‍ നടപടി സ്വീകരിക്കണമെന്ന് യോഗം ആവശ്യപ്പെട്ടു.
യോഗത്തില്‍ ഡി.സി.സി പ്രസിഡന്റ് എം. ലിജു അധ്യക്ഷനായി. കെ.പി.സി.സി ജനറല്‍ സെക്രട്ടറി സി.ആര്‍ ജയപ്രകാശ്, എ.എ ഷുക്കൂര്‍, ഡി. സുഗതന്‍, മാന്നാര്‍ അബ്ദുള്‍ ലത്തീഫ് ഇ. സമീര്‍, കെ.കെ ഷാജു, സി.കെ ഷാജി മോഹന്‍, കോശി എം കോശി, എം.എം ബഷീര്‍ , ജി. മുകുന്ദന്‍പിള്ള , എം.എന്‍ ചന്ദ്ര പ്രകാശ്, അനില്‍ ബോസ്, ടി. സുബ്രമണ്യ ദാസ്, ജി. സഞ്ജീവ് ഭട്ട്, ജെ.ടി റാംസേ, പ്രതാപന്‍ പറവേലി, ടി.വി രാജന്‍ സംസാരിച്ചു.