വെഞ്ഞാറമൂട്: ആഘോഷങ്ങളെക്കാള്‍ പ്രധാനമാണ് ദുരന്തത്തിനിരയായവരെ സഹായിക്കലെന്ന് അധ്യാപകര്‍ പകര്‍ന്നു നല്‍കിയ പാഠം വിദ്യാര്‍ഥികള്‍ യാഥാര്‍ഥ്യമാക്കി. വെമ്പായം ഓക്‌സ്‌ഫോഡ് മോഡല്‍ സ്‌കൂളിലെ കുരുന്നു വിദ്യാര്‍ഥികളാണ് ഓണത്തിനും പെരുന്നാളിനുമൊക്കയായി ബന്ധുക്കള്‍ സംഭാവനയായി നല്കിയ കൊച്ചു കൊച്ചു തുകകള്‍ സ്വരുക്കൂട്ടി മുഖ്യമന്ത്രിയുടെ പ്രളയ ദുരിതാശ്വാസ നിധിയിലേക്ക് സംഭാവന ചെയ്ത് മാതൃകയായത്.
സ്‌കൂള്‍ മാനേജ്‌മെന്റും അധ്യാപക രക്ഷാകത്തൃ സമിതിയും വിദ്യാര്‍ഥികളുടെ തീരുമാനത്തെ പിന്തുണച്ചു. മാനേജ്‌മെന്റ് ഓണാഘോഷ പരിപാടികള്‍ ഒഴിവാക്കി അതിനായി കരുതിയ തുക വിദ്യാര്‍ഥികള്‍ സ്വരൂപിച്ച ദുരിതാശ്വാസ ഫണ്ടിലേക്ക് നല്‍കി. ഇതും കൂടി ചേര്‍ന്നതോടെ 61,000 രൂപയായി. പ്രസ്തുത തുകക്കുള്ള ചെക്ക് കഴിഞ്ഞ ദിവസം സെക്രട്ടേറിയേറ്റിലെ ഓഫിസിലെത്തി വിദ്യാര്‍ഥി പ്രതിനിധികളായ വിസ്മയും സാലിമും ചേര്‍ന്ന് മുഖ്യമന്ത്രിക്കു കൈമാറി. പ്രിന്‍സിപ്പല്‍ റിന്‍സി സതീഷ്, അധ്യാപക രക്ഷാകര്‍ത്തൃ സമിതി പ്രസിഡന്റ് കെ. മുഹമ്മദ് റാഫി, സ്‌കൂള്‍ ട്രസ്റ്റ് സെക്രട്ടറി സമദ്, ഫാത്തിമ സംബന്ധിച്ചു.