സ്വന്തം ലേഖകന്‍

തിരുവനന്തപുരം: സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന്‍ ബിനീഷ് കോടിയേരിക്കെതിരേ സി.പി.എം സംസ്ഥാന സെക്രട്ടേറിയറ്റിന് പരാതി നല്‍കാനൊരുങ്ങി വ്യവസായ മന്ത്രി ഇ.പി ജയരാജനും കുടുംബവും. 

സ്വര്‍ണക്കടത്ത് കേസ് പ്രതിയുമായുള്ള ബന്ധത്തില്‍ തന്റെ മകനെ കൊണ്ടുപോയി കുരുക്കിയത് ബിനീഷാണെന്നാണ് ജയരാജന്റെ കുടുംബത്തിന്റെ ആരോപണം എന്നറിയുന്നു. ബിനീഷിനു പിന്നാലെ  സ്വര്‍ണക്കടത്ത് കേസില്‍ മകന്‍ ജയ്‌സന്റെ പേര് പുറത്തുവന്നതില്‍ ഗൂഢാലോചനയുണ്ടെന്നാണ് ജയരാജന്‍ ഉന്നയിക്കുന്ന പരാതി. സ്വപ്നയ്‌ക്കൊപ്പം ജയ്‌സന്‍ നില്‍ക്കുന്ന ഫോട്ടോ പുറത്തുവിട്ടത് ബിനീഷാണെന്ന് ജയരാജനും കുടുംബവും സംശയിക്കുന്നു. അടുത്ത സംസ്ഥാന സെക്രട്ടേറിയറ്റ് യോഗത്തില്‍ സ്വര്‍ണക്കടത്ത് കേസ് ചര്‍ച്ചയാകുമ്പോള്‍ പരാതി ഉന്നയിക്കാനാണ് ജയരാജന്റെ തീരുമാനം. 

2018ലാണ് സ്വപ്നയ്ക്ക് ജയരാജന്റെ മകന്‍ പാര്‍ട്ടി നടത്തിയത്. പാസ്‌പോര്‍ട്ട് സംബന്ധമായ പ്രശ്‌നം പരിഹരിച്ചുകൊടുത്തതിന്റെ പ്രത്യുപകാരമായിരുന്നു പാര്‍ട്ടി. ബിനീഷ് മുഖേനയാണ് ജയ്‌സന്‍ സ്വപ്നയെ പരിചയപ്പെട്ടത്. പാര്‍ട്ടി നടത്തണമെന്നാവശ്യപ്പെട്ടതും വേണ്ട ക്രമീകരണങ്ങളെല്ലാം തലസ്ഥാനത്തെ പഞ്ചനക്ഷത്ര ഹോട്ടലില്‍ ചെയ്തതും ബിനീഷ് തന്നെയായിരുന്നു. സ്വപ്നയും ബിനീഷും ജയ്‌സനുമടക്കം ഏഴു പേര്‍ മാത്രം പങ്കെടുത്ത പാര്‍ട്ടിക്കിടെ എടുത്ത മൊബൈല്‍ വിഡിയോ ദൃശ്യങ്ങളാണ് എന്‍ഫോഴ്‌സമെന്റിന്റെ കൈയില്‍ കിട്ടിയതും ഇപ്പോള്‍ പുറത്തുവന്നതും. ഇതിലാണ് ജയരാജനും കുടുംബവും ദുരൂഹത കാണുന്നത്

ബിനീഷിനെ എന്‍ഫോഴ്‌സ്‌മെന്റ് ഡയരക്ടറേറ്റ് ചോദ്യം ചെയ്തതിനു പിന്നാലെയാണ് ജയ്‌സന്റെ ഫോട്ടോ പുറത്തുവന്നത്. 2018ന് ശേഷം സ്വപ്നയുമായി ജയ്‌സന് യാതൊരു ബന്ധവുമില്ലെന്നാണ് ജയരാജന്‍ പാര്‍ട്ടി നേതൃത്വത്തെ അറിയിച്ചിരിക്കുന്നത്. എന്നിട്ടും ഈ ചിത്രം പുറത്തുവിട്ട് തന്നെയും കുടുംബത്തെയും ബിനീഷ് ആക്ഷേപിച്ചെന്നാണ് ജയരാജന്റെ പരാതി. ഇതില്‍ ഗൂഢാലോചനയുണ്ടെന്നു പറഞ്ഞായിരിക്കും പാര്‍ട്ടിക്ക് പരാതി നല്‍കുക. ബിനീഷിന് പാര്‍ട്ടി പിന്‍ബലം നഷ്ടമാകുമെന്ന് കണ്ടാണ് തന്റെ മകനെയും ഇതില്‍ കുരുക്കിയതെന്നും ചില സംസ്ഥാന നേതാക്കളെ അദ്ദേഹം അറിയിച്ചതായാണ് വിവരം.