വടക്കാഞ്ചേരി: ഉരുള്‍പൊട്ടല്‍ ദുരന്തത്തെ തുടര്‍ന്ന് 19 പേരുടെ ജീവന്‍ നഷ്ടപ്പെടുകയും കോടി കണക്കിന് രൂപയുടെ സാമ്പത്തിക നഷ്ടം സംഭവിയ്ക്കുകയും ചെയ്ത വടക്കാഞ്ചേരി നഗരസഭയിലെ കുറാഞ്ചേരിയെ പഴയ പ്രതാപത്തിലേക്ക് എത്തിക്കാന്‍ വിവിധ വകുപ്പുകളുടെ ഊര്‍ജിത പ്രവര്‍ത്തനം. ആധുനിക കുറാഞ്ചേരി കെട്ടിപടുക്കാന്‍ ജനങ്ങളും ഒറ്റകെട്ടായി രംഗത്തിറങ്ങുമ്പോള്‍ അത് വലിയൊരു ജനകീയ മുന്നേറ്റമായി മാറുകയാണ്. ഒരു നിമിഷം കൊണ്ട് തകര്‍ന്നടിഞ്ഞ നാടിനെ കെട്ടിപടുക്കാന്‍ നഗരസഭയും തെക്കുംകര പഞ്ചായത്തും സംസ്ഥാന സര്‍ക്കാരിന്റെ സാമ്പത്തിക സഹായം തേടിയിട്ടുണ്ട്.
നഷ്ടപ്പെട്ട അതിര്‍ത്തികള്‍ അളന്ന് തിട്ടപ്പെടുത്തി മണ്ണിട്ട് നികത്തി പൂര്‍വസ്ഥിതിയിലാക്കുന്ന പ്രവര്‍ത്തനം പൂര്‍ത്തിയായി. തകര്‍ന്ന സംസ്ഥാന പാതയിലൂടെയുള്ള ഗതാഗതം വഴി തിരിച്ച് വിട്ടായിരുന്നു പുനര്‍നിര്‍മാണ പ്രവര്‍ത്തനം നടക്കുന്നത്. മണ്ണ് വന്ന് മൂടിയ കാനകളും, കലുങ്കുകളുമൊക്കെ വീണ്ടെടുത്തു. ഓട്ടോസ്റ്റാന്റ് പുനസ്ഥാപിച്ചു. വ്യാപാര സ്ഥാപനങ്ങളെല്ലാം തുറന്ന് പ്രവര്‍ത്തനമാരംഭിച്ചു. പുതിയതായി ഭൂമി അളന്ന് തിട്ടപ്പെടുത്തിയപ്പോള്‍ ഇപ്പോള്‍ പ്രവര്‍ത്തിക്കുന്ന പല വ്യാപാര സ്ഥാപനങ്ങളും പുറമ്പോക്കിലാണെന്ന് കണ്ടെത്തിയിട്ടുണ്ട്. വൈദ്യുതി വിഭാഗമെത്തി സംസ്ഥാന പാതയോട് ചേര്‍ന്ന പ്രദേശത്ത് കാലുകള്‍ സ്ഥാപിക്കുന്ന പ്രവര്‍ത്തനം ആരംഭിച്ചു. നാളെ പൂര്‍ത്തിയാകുമെന്നാണ് കരുതുന്നത്. എല്ലാ കാലുകളിലും വഴിവിളക്കുകള്‍ സ്ഥാപിക്കാനാണ് തീരുമാനം.
നിര്‍മാണ പ്രവര്‍ത്തനങ്ങള്‍ക്ക് മേല്‍നോട്ടം വഹിക്കാന്‍ ജനപ്രതിനിധികളും രംഗത്തുണ്ട്. ഈയാഴ്ചയോടെ പുനര്‍നിര്‍മാണ പ്രവര്‍ത്തനങ്ങളുടെ ആദ്യഘട്ടം പൂര്‍ത്തിയാകും.