ഗസ്സ: ഗസ്സയും ദക്ഷിണ ഇസ്‌റാഈലും തമ്മില്‍ മൂന്നു ദിവസമായി തുടരുന്ന ആക്രമണങ്ങള്‍ക്കൊടുവില്‍ ഇരു വിഭാഗവും തമ്മില്‍ വെടിനിര്‍ത്തല്‍ നിലവില്‍വന്നതായി ഫലസ്തീന്‍ ഉദ്യോഗസ്ഥര്‍ അറിയിച്ചു. ഈജിപ്തിന്റെയും ഖത്തറിന്റെയും മധ്യസ്ഥതയില്‍ നടന്ന ചര്‍ച്ചയാണ് വെടിനിര്‍ത്തലിലെത്തിച്ചതെന്ന് ഗസ്സ അധികൃതരും വ്യക്തമാക്കി. ഇതിനു ശേഷം ഇസ്‌റാഈല്‍ വ്യോമാക്രമണം നടത്തിയിട്ടില്ലെന്നും അവര്‍ കൂട്ടിച്ചേര്‍ത്തു. ഈജിപ്തും ഇത് ശരിവച്ചു. അതേസമയം, ഇതു സംബന്ധിച്ച് ഇസ്‌റാഈല്‍ അധികൃതര്‍ പ്രതികരിച്ചിട്ടില്ല. എന്നാല്‍, ഗസ്സ അതിര്‍ത്തിയില്‍നിന്ന് ഇസ്‌റാഈല്‍ സേന സുരക്ഷാസന്നാഹങ്ങള്‍ മാറ്റിയതായി റിപ്പോര്‍ട്ടുണ്ട്. ജനങ്ങളോട് വീടുകളിലേക്കു മടങ്ങാന്‍ സൈന്യം നിര്‍ദേശിച്ചിട്ടുമുണ്ട്. ദക്ഷിണ ഇസ്‌റാഈലിലെ എല്ലാ പൊതു ബസ് റൂട്ടുകളിലും സാധാരണപോലെ സര്‍വിസ് നടത്താന്‍ ഇസ്‌റാഈല്‍ ഗതാഗതമന്ത്രാലയം നിര്‍ദേശിച്ചതായും വാര്‍ത്തയുണ്ട്. റെയില്‍വേ ഗതാഗതം പുനരാരംഭിച്ചു.

വെടിനിര്‍ത്തല്‍ സ്വാഗതം ചെയ്യുന്നതായി വെസ്റ്റ് ബാങ്ക് കേന്ദ്രമായ ഫലസ്തീന്‍ അതോറിറ്റിയുടെ പ്രധാനമന്ത്രി മുഹമ്മദ് ശതയ്യ പറഞ്ഞു. ഇസ്‌റാഈലി അധിനിവേശം തടയാന്‍ യു.എന്‍ മുന്‍കൈയെടുക്കണമെന്നും അദ്ദേഹം ആവശ്യപ്പെട്ടു.
മൂന്നു ദിവസമായി തുടരുന്ന സംഘര്‍ഷങ്ങളില്‍ ഒരു ഗര്‍ഭിണിയും നാലുമാസമുള്ള കുഞ്ഞുമുള്‍പ്പെടെ 25 ഫലസ്തീനികളും നാല് ഇസ്‌റാഈലികളും കൊല്ലപ്പെട്ടിരുന്നു. കൊല്ലപ്പെട്ടവരില്‍ ഹമാസ് കമാന്‍ഡറുമുണ്ടെന്ന് റിപ്പോര്‍ട്ടുണ്ട്. 20 ലക്ഷം ആളുകള്‍ ജീവിക്കുന്ന ഗസ്സ ഒരേസമയം ഇസ്‌റാഈലിന്റെയും ഈജിപ്തിന്റെയും തടസങ്ങള്‍ കാരണം വര്‍ഷങ്ങളായി വിദേശസഹായങ്ങളും വിഭവങ്ങളും ലഭിക്കാതെ പ്രയാസപ്പെടുകയാണ്. അതേസമയം, ഹമാസിന് ആയുധങ്ങള്‍ വരുന്നത് തടയുകയാണ് തങ്ങള്‍ ചെയ്യുന്നതെന്നാണ് ഇസ്‌റാഈല്‍ വാദം.

ഇസ്‌റാഈലിന് പൂര്‍ണ പിന്തുണ പ്രഖ്യാപിച്ച് ട്രംപ്

വാഷിങ്ടണ്‍: ഫലസ്തീനിലെ ഗസ്സയില്‍ വ്യോമാക്രമണം നടത്തിയ ഇസ്‌റാഈലിന് അമേരിക്ക പൂര്‍ണ പിന്തുണ നല്‍കുമെന്ന് പ്രസിഡന്റ് ഡൊണാള്‍ഡ് ട്രംപ്. ഹമാസ്, ഇസ്‌ലാമിക് ജിഹാദ് ഭീകരസംഘടനകളുടെ റോക്കറ്റ് ആക്രമണം നേരിടുന്ന ഇസ്‌റാഈലിന് പൗരന്മാരുടെ സുരക്ഷ ഉറപ്പാക്കുന്നതിന് നൂറശതമാനം പിന്തുണയും നല്‍കുന്നുവെന്നാണ് ട്രംപ് ട്വിറ്ററില്‍ കുറിച്ചത്.