ക്വാലാലംപൂര്‍: ഏഷ്യന്‍ സ്‌ക്വാഷ് ചാംപ്യന്‍ഷിപ്പില്‍ ഇന്ത്യന്‍ താരങ്ങളായ സൗരവ് ഘോഷാലിനും ജോഷ്‌ന ചിന്നപ്പക്കും കിരീടം. വനിതാ വിഭാഗത്തില്‍ ജോഷ്‌ന ചിന്നപ്പ ഹോങ്കോങ്ങിന്റെ ആനി ഔവിനെ 11-5, 8-11, 11-6, 11-6 എന്ന സ്‌കോറിനാണ് കീഴ്‌പ്പെടുത്തിയത്. നിലവിലെ ചാംപ്യനായ ജോഷ്‌ന മികച്ച പോരാട്ടത്തിലൂടെയായിരുന്നു കിരീടം നിലനിര്‍ത്തിയത്.
പുരുഷ വിഭാഗത്തില്‍ ഹോങ്കോങ്ങിന്റെ ലിയോ ഔ ചുന്‍ മിങ്ങിനെ 11-9, 11-2, 11-8 എന്ന സ്‌കോറിന് പരാജയപ്പെടുത്തിയാണ് കലാശപ്പോരില്‍ സൗരവ് വിജയം സ്വന്തമാക്കിയത്. എതിരാളിക്ക് ഒരു അവസരവും നല്‍കാതെയായിരുന്നു സൗരവിന്റെ കിരീട നേട്ടം. ആദ്യ സെറ്റില്‍ മാത്രമാണ് കാര്യമായ എതിര്‍പ്പ് നേരിടേണ്ടണ്ടിവന്നത്. കഴിഞ്ഞമാസം മക്കാവു ഓപ്പണില്‍ ആനിയില്‍നിന്നേറ്റ തോല്‍വിക്ക് മധുരപ്രതികാരം കൂടിയായി ജോഷ്‌ന ചിന്നപ്പയുടെ വിജയം.