സ്വന്തം ലേഖകന്‍ 

തിരുവനന്തപുരം: കൊവിഡ് പോസിറ്റീവാകുന്ന അതിഥിതൊഴിലാളികള്‍ക്ക് രോഗ ലക്ഷണമില്ലെങ്കില്‍ അവരെ ജോലിക്ക് നിയോഗിക്കാമെന്ന പൊതുഭരണവകുപ്പിന്റെ വിവാദ ഉത്തരവ് റദ്ദാക്കി. ഉത്തരവ് വിവാദമാവുകയും  ആരോഗ്യവകുപ്പിന്റെയുള്‍പ്പെടെ എതിര്‍പ്പുയരുകയും ചെയ്തതിനെ തുടര്‍ന്ന്  ഉത്തരവ് റദ്ദാക്കണമെന്ന് ചീഫ് സെക്രട്ടറി ബിശ്വാസ് മേത്ത   പൊതുഭരണവകുപ്പ് അഡീഷണല്‍ ചീഫ് സെക്രട്ടറി സത്യജിത്ത് രാജനോട് രേഖാമൂലം ആവശ്യപ്പെട്ടിരുന്നു. കൊവിഡ് പോസിറ്റീവാകുന്ന അതിഥി തൊഴിലാളികള്‍ രോഗമുക്തരാകുന്നത് വരെ അവര്‍ക്ക് പൂര്‍ണ വിശ്രമം അനുവദിക്കുകയും മാറ്റിപ്പാര്‍പ്പിക്കുകയും വേണം. കഴിഞ്ഞ തിങ്കളാഴ്ച്ച പുറത്തിറക്കിയ  വിവാദ ഉത്തരവ് റദ്ദാക്കി പുതിയ ഉത്തരവ്  പുറത്തിറക്കണമെന്നും  ചീഫ് സെക്രട്ടറി നിര്‍ദേശം നല്‍കിയിരുന്നു. 

സംസ്ഥാനത്ത് തദ്ദേശ തെരഞ്ഞെടുപ്പ് അടുത്തുവരുന്ന സാഹചര്യത്തില്‍ നിര്‍മാണ പ്രവൃത്തികള്‍ വേഗത്തില്‍ തീര്‍ക്കുന്നതിന്  കരാറുകാരുടെ സമ്മര്‍ദത്തിനു വഴങ്ങിയാണ് സര്‍ക്കാര്‍ കൊവിഡ് പോസിറ്റീവാകുന്ന അതിഥി തൊഴിലാളികളെയും ജോലിക്ക് നിയോഗിക്കാന്‍ തീരുമാനിച്ചതെന്ന് ആക്ഷേപമുയര്‍ന്നിരുന്നു. 

നിലവില്‍ കൊവിഡ് പോസിറ്റീവാകുന്നവര്‍, രോഗലക്ഷണമില്ലെങ്കിലും  കുറഞ്ഞത് 10 ദിവസം ക്വാറന്റൈനില്‍ കഴിഞ്ഞതിനു ശേഷം ആന്റിജന്‍ പരിശോധന നടത്തണമെന്നും നെഗറ്റീവായാലും ഏഴു ദിവസം കൂടി ക്വാറന്റൈനില്‍  തുടരണമെന്നുമാണ് നിഷ്‌കര്‍ഷിക്കുന്നത്. ഇത് മറികടന്നാണ് പൊതുഭരണവകുപ്പ് വിവാദ ഉത്തരവ് പുറത്തിറക്കിയത്.