പാനൂര്‍: കനത്തമഴയില്‍ കടവത്തൂരില്‍ ഇരുനില വീട് തകര്‍ന്നു. കടവത്തൂര്‍ കുറൂളിക്കാവിനടുത്തുള്ള കല്ലറ ശശിയുടെ വീടാണ് കഴിഞ്ഞദിവസം രാത്രി തകര്‍ന്നു വീണത്. ശശിയും ഭാര്യ റീനയും സഹോദരന്‍ ചന്ദ്രന്റെ മകന്‍ അര്‍ജുനുമാണ് വീട്ടിലുണ്ടായിരുന്നത്. വീട് തകര്‍ന്ന് വീഴുന്ന ശബ്ദം കേട്ട് മൂവരും ഇറങ്ങി ഓടിയതിനാല്‍ പരുക്കേല്‍ക്കാതെ രക്ഷപ്പെട്ടു. ഓടിട്ട മേല്‍ക്കൂര തകര്‍ന്ന് മുഴുവന്‍ ഓടുകളും നിലത്തുവീണു തകര്‍ന്നു. കൂലി പണിക്കാരനാണ് ശശി. ദുരിതാശ്വാസ നിധിയില്‍ നിന്നു സാമ്പത്തിക സഹായം ലഭ്യമാക്കുമെന്ന് തൃപ്രങ്ങോട്ടൂര്‍ പഞ്ചായത്ത് പ്രസിഡന്റ് കാട്ടൂര്‍ മുഹമ്മദ് പറഞ്ഞു.