ഇരിട്ടി: മലയോര മേഖലയില്‍ കാട്ടാന വിളയാട്ടം. ഉരുപ്പുംകുറ്റി, എടപ്പുഴ, പാറയ്ക്കാപ്പാറ, ഈന്തുംകരി തുടങ്ങിയ സ്ഥലങ്ങളില്‍ ആനക്കൂട്ടം നിരവധി കര്‍ഷകരുടെ തോട്ടങ്ങള്‍ നശിപ്പിച്ചു. കര്‍ണാടക വനത്തില്‍ നിന്നു വരുന്ന ആനകള്‍ വനാതിര്‍ത്തിയില്‍ തന്നെ തമ്പടിച്ചതിനാല്‍ ജനങ്ങള്‍ ഭീതിയിലാണ്. കഴിഞ്ഞ ദിവസം ജനവാസ മേഖലയില്‍ ഇറങ്ങിയ ആന എടപ്പുഴയിലെ സണ്ണി കുന്നില്‍, ബെന്നി കുന്നില്‍, റോബര്‍ട്ട്, ബെന്നി ഇഴക്കുന്നേല്‍, ജോയ് കുന്നില്‍ എന്നിവരുടെ കാര്‍ഷിക വിളകള്‍ വ്യാപകമായി നശിപ്പിച്ചിരുന്നു. വനമേഖലയോടു ചേര്‍ന്ന ആയാംകുടി ഭാഗത്ത് ഒരു കിലോമീറ്റര്‍ ദൂരം വേലി സ്ഥാപിച്ചാല്‍ കാട്ടാന ജനവാസ പ്രദേശത്തേക്ക് പ്രവേശിക്കുന്നത് തടയാന്‍ കഴിയുമെന്നാണ് നാട്ടുകാര്‍ പറയുന്നത്. പകല്‍ സമയത്തുപോലും  ആനയെ പേടിച്ച് പുറത്തിറങ്ങാന്‍ നാട്ടുകാര്‍ക്ക് പറ്റാത്ത സ്ഥിതിയാണ്.