പാറക്കടവ്: എസ്.എസ്.എല്‍.സി ഫലം വന്നതോടെ അറബിക് ഒന്നാം ഭാഷയായി തിരഞ്ഞെടുത്ത ഉണ്ണിമായക്ക് മികച്ച വിജയം. ഉമ്മത്തൂര്‍ എസ്.ഐ ഹയര്‍ സെക്കന്‍ഡറി സ്‌കൂളില്‍ എട്ടാം തരത്തില്‍ പ്രവേശനം നേടുമ്പോള്‍ കൂട്ടുകാര്‍ക്കൊപ്പം ഉണ്ണിമായ മനോജും അറബിക് ഒന്നാം ഭാഷയായി തിരഞ്ഞെടുക്കുകയായിരുന്നു.  പഠനരംഗത്ത് അറബിക് ഭാഷ വശമില്ലാത്തതിനാല്‍ രക്ഷിതാക്കളും ആദ്യമൊക്കെ ആശങ്കയിലായിരുന്നു. എന്നാല്‍ സ്‌കൂള്‍ ഏഴാം തരം വരെയും മദ്‌റസയില്‍ നിന്ന് അറബിക് പഠിച്ചെത്തിയവര്‍ക്കൊപ്പം പിന്നീട് ഉണ്ണിമായയും അനായാസം പഠനം പൂര്‍ത്തിയാക്കി. ഇന്ന് ഉണ്ണിമായക്ക് അറബിക് വിഷയം കഴിഞ്ഞേ മറ്റു മറ്റുഭാഷകളുള്ളൂ.  അറബിക്കില്‍ എപ്ലസ് നേടുമോയെന്ന് ചെറിയ ആശങ്കയുണ്ടായിരുന്നെങ്കിലും ഫലം വന്നതോടെ വിജയം ഉറപ്പിച്ച് അധ്യാപകരുടെയും വിദ്യാര്‍ഥികളുടെയും ശ്രദ്ധാകേന്ദ്രമായി മാറിയിരിക്കുകയാണ് ഉമ്മത്തൂരിലെ തുണ്ടിയില്‍ മനോജിന്റെയും ലിനിഷയുടെയും മകളായ ഈ മിടുക്കി. അറബിക് അധ്യാപകനായ പി.പി അബ്ദുല്‍ ഹമീദിന്റെ ശിക്ഷണത്തിലാണ് അറബിക് പഠനം പത്താം തരത്തില്‍ ഉണ്ണിമായ മനോജ് പൂര്‍ത്തിയാക്കിയത്.