തിരുവമ്പാടി: സേക്രഡ് ഹാര്‍ട്ട് ഹയര്‍ സെക്കന്‍ഡറി സ്‌കൂള്‍ മുറ്റത്ത് കൃഷി വകുപ്പിന്റെ സഹകരണത്തോടെ കരനെല്‍ കൃഷി ആരംഭിച്ചു.
ആധുനിക കൃഷിരീതികള്‍ വിദ്യാര്‍ഥികളെ പരിചയപ്പെടുത്തുന്നതിന്റെ ഭാഗമായി മിനി പവര്‍ ട്രില്ലര്‍ ഉപയോഗിച്ച് നിലമുഴുതു മറിച്ച ശേഷം 120 ദിവസം കൊണ്ട് വിളവെടുക്കാവുന്ന ഉമ എന്ന വിത്താണ് വിതച്ചത്.
പട്ടാമ്പി നെല്ല് ഗവേഷണ കേന്ദ്രത്തില്‍ നിന്നുള്ള വിത്ത് തിരുവമ്പാടി കൃഷിഭവന്‍ മുഖേനയാണ് ലഭ്യമാക്കിയത്.
വിത്ത് വിതക്കലിന്റെ ഉദ്ഘാടനം തിരുവമ്പാടി ഗ്രാമപഞ്ചായത്ത് പ്രസിഡന്റ് പി.ടി അഗസ്റ്റിന്‍ നിര്‍വഹിച്ചു.
ഹെഡ്മാസ്റ്റര്‍ കെ.എം സണ്ണി, കൃഷി അസിസ്റ്റന്റുമാരായ അബ്ദുല്‍ ഖാദര്‍, എന്‍.കെ സുമേഷ്, കാര്‍ഷിക ക്ലബ് കണ്‍വീനര്‍ ജെയിംസ് ജോഷി, അധ്യാപകരായ ഷാജി അഗസ്റ്റിന്‍, ട്രീസമ്മ ജോസഫ്, ലിന്‍സി ജോസഫ്, അശ്വിന്‍ കല്ലാനോട് ,പി.ടി.എ പ്രതിനിധി അശോകന്‍ മുതിയോട്ടുമ്മല്‍ എന്നിവരും വിദ്യാര്‍ഥികളും പങ്കാളികളായി.
ഹരിതവിദ്യാലയ അന്തരീക്ഷം നിലനിര്‍ത്തുന്നതിന്റെ സ്‌കൂള്‍ കോമ്പൗണ്ടില്‍ ചേന,വാഴ,ഇഞ്ചി,മഞ്ഞള്‍,പച്ചക്കറി എന്നിവയും കൃഷി ചെയ്തിട്ടുണ്ട്.