അരീക്കോട്: ചാലിയാറിലെ വിവിധ കടവുകളില്‍ നിന്ന് വ്യാപകമായി മണല്‍ കടത്തല്‍ തുടരുന്നു. ദിനംപ്രതി നൂറിലേറെ വാഹനങ്ങളില്‍ രാത്രി മുതല്‍ പുലരുന്നതുവരെ മണല്‍ കൊള്ള തുടര്‍ന്നുകൊണ്ടിരിക്കയാണ്. ചെറുതും വലുതുമായ വാഹനങ്ങളില്‍ മണല്‍കടത്ത് വ്യാപകമായി തുടരുമ്പോഴും ബന്ധപ്പെട്ട ഉദ്യോഗസ്ഥര്‍ കണ്ണടക്കുകയാണെന്ന് ആക്ഷേപമുയരുന്നുണ്ട്.
നിലവില്‍ അനധികൃതമായി മണല്‍ക്കൊള്ള നടത്തുന്നവരെ പിടികൂടാന്‍ ജില്ലാ പോലിസ് മേധാവിയുടെ കീഴില്‍ പ്രത്യേക സ്‌ക്വാഡ് പ്രവര്‍ത്തിക്കുന്നുണ്ടെങ്കിലും പരിശോധനാ വിവരം മണല്‍കടത്ത് സംഘത്തിന് നേരത്തെ തന്നെ ലഭിക്കുന്നതിനാല്‍ പൊലീസ് എത്തുമ്പോഴേക്കും രക്ഷപ്പെടുകയാണ് ചെയ്യുന്നത്. ഇതു മൂലം മണല്‍കടത്ത് പിടിക്കാന്‍ കഴിയാതെ മടങ്ങുകയാണ് എസ്.പിയുടെ കീഴിലുള്ള പ്രത്യേക ടീം. അരീക്കോട്, വാഴക്കാട്, എടവണ്ണ സ്റ്റേഷന്‍ പരിധിയില്‍ മണല്‍കടത്ത് കണ്ടെത്താന്‍ യന്ത്രവല്‍കൃത ബോട്ടുകള്‍ ഉള്‍പ്പെടെയുള്ള സംവിധാനങ്ങള്‍ ഉണ്ടായിട്ടും വേണ്ട രീതിയില്‍ പരിശോധന നടത്താന്‍ അധികൃതര്‍ തയാറാകുന്നില്ലെന്ന ആക്ഷേപം വ്യാപകമായിരിക്കുകയാണ്.
നേരത്തെ പ്രവര്‍ത്തിച്ചിരുന്ന കടവുകളിലെല്ലാം പൊലിസ് ചങ്ങലയിട്ട് പൂട്ടിയിരുന്നു. എന്നാല്‍ ഈ ചങ്ങലകള്‍ പൊട്ടിച്ചാണ് ഇപ്പോള്‍ മണല്‍ കടത്തുന്നത്. വാഹനങ്ങളുടെ താഴ്ഭാഗത്ത് മണല്‍ നിറച്ച് മുകളില്‍ എം.സാന്‍ഡ് വിതറി മണല്‍ കടത്തുന്നവരുമുണ്ട്. വ്യാപകമായി മണല്‍ വാരിയതിന്റെ ഫലമായി അടിതട്ട് ചളിയും മാലിന്യവും നിറഞ്ഞതിനെ തുടര്‍ന്ന് കഴിഞ്ഞ വേനലില്‍ ബ്ലൂ ഗ്രീന്‍ ആല്‍ഗ പ്രതിഭാസം രൂപപ്പെട്ട് ചാലിയാര്‍ മലിനമായിരുന്നു. ഇതോടെ ചാലിയാറില്‍ നിന്നും മഞ്ചരി മുനിസിപ്പാലിറ്റിയിലെയും കോഴിക്കോട് കോര്‍പ്പറേഷനിലെയും പതിനഞ്ചോളം പഞ്ചായത്തുകളിലെ രണ്ടര ലക്ഷത്തോളം കുടുംബങ്ങളുടെയും കുടിവെള്ള വിതരണവും പ്രതിസന്ധിയിലായിരുന്നു. മണല്‍വാരല്‍ തുടര്‍ന്നാല്‍ വേനല്‍ രൂക്ഷമാകുന്നതോടെ ചാലിയാര്‍ മലിനമാകാന്‍ സാധ്യതയുണ്ടെന്നാണ് വിലയിരുത്തല്‍.