ന്യൂഡല്‍ഹി:  സി.പി.എം പ്രവര്‍ത്തകര്‍ പ്രതികളായ പെരിയയിലെ കൃപേഷ്, ശരത്‌ലാല്‍ വധക്കേസ് സി.ബി.ഐ ഏറ്റെടുത്തിട്ട്  ഒന്‍പതുമാസം കഴിഞ്ഞിട്ടും കേസ് ഡയറിയും അനുബന്ധ രേഖകളും കൈമാറാന്‍ തയാറാകാത്ത ക്രൈംബ്രാഞ്ച് നടപടിക്കെതിരേ കേന്ദ്രം ഇടപെടണമെന്ന് രാജ്‌മോഹന്‍ ഉണ്ണിത്താന്‍ ലോക്‌സഭയില്‍ ആവശ്യപ്പെട്ടു. കേസ് ഡയറി കൈമാറാന്‍ കേന്ദ്രം സംസ്ഥാന സര്‍ക്കാരിനോട് നിര്‍ദേശിക്കണം. 

സി.ബി.ഐക്ക് കേസ് ഡയറിയും അനുബന്ധ രേഖകളും കൈമാറാന്‍ ഹൈക്കോടതി ഒന്‍പതുമാസം മുന്‍പ് നിര്‍ദേശിച്ചതാണ്. എന്നാല്‍, സംസ്ഥാന സര്‍ക്കാര്‍, സിംഗിള്‍ ബെഞ്ച് വിധിക്കെതിരേ ഡിവിഷന്‍ ബെഞ്ചിനെ സമീപിച്ചു. 

സിംഗിള്‍ ബെഞ്ച് വിധിക്കെതിരേ സംസ്ഥാന ഖജനാവില്‍ നിന്ന് 88 ലക്ഷം രൂപ ചെലവഴിച്ച് ഡല്‍ഹിയില്‍ നിന്ന് അഭിഭാഷകരെ കൊണ്ടുവന്ന് പ്രതികളെ രക്ഷിക്കാനാണ് സര്‍ക്കാര്‍ ശ്രമിച്ചത്. 

ഡിവിഷന്‍ ബെഞ്ച് കഴിഞ്ഞ ഓഗസ്റ്റ് 24ന് സിംഗിള്‍ ബെഞ്ച് വിധി ശരിവച്ചു. ഇപ്പോഴും സംസ്ഥാന സര്‍ക്കാര്‍ കേസ് ഡയറി സി.ബി.ഐക്ക് കൈമാറില്ലെന്ന മര്‍ക്കടമുഷ്ടി തുടരുകയാണെന്നും രാജ്‌മോഹന്‍ ഉണ്ണിത്താന്‍ കുറ്റപ്പെടുത്തി.