വാഷിങ്ടണ്‍: 200 ബില്യന്‍ യു.എസ് ഡോളര്‍ മൂല്യമുള്ള ചൈനീസ് ഉല്‍പന്ന ഇറക്കുമതി തീരുവ അമേരിക്ക 25 ശതമാനമാക്കി ഉയര്‍ത്തുന്നു. നേരത്തെ ഇത് 10 ശതമാനമായിരുന്നു. വെള്ളിയാഴ്ച മുതല്‍ പുതുക്കിയ നിരക്ക് നിലവില്‍വരുമെന്ന് ഫെഡറല്‍ രജിസ്റ്ററില്‍ പോസ്റ്റ് ചെയ്ത നോട്ടിസില്‍ പറയുന്നു. യു.എസ് വ്യാപാര പ്രതിനിധികളുടെ ഓഫിസ് ഇതില്‍ ഇളവുള്ള ഉല്‍പന്നങ്ങളുടെ പട്ടിക ഉടന്‍ പ്രസിദ്ധീകരിക്കും.

ചൈനയുടെ കയറ്റുമതി മുന്‍ വര്‍ഷത്തെ അപേക്ഷിച്ച് ഏപ്രിലില്‍ 2.7 ശതമാനം കുറഞ്ഞിരുന്നു. അതേസമയം, ഇറക്കുമതി വര്‍ധിക്കുകയും ചെയ്തു. ഒരു വര്‍ഷത്തിനിടെ 4.0 ശതമാനം വര്‍ധനയാണുണ്ടായത്. അതിനിടെ വ്യാപാരരംഗത്ത് ചൈനയും യു.എസും തമ്മില്‍ അനുരഞ്ജനമുണ്ടായാല്‍ യു.എസില്‍ നിന്നുള്ള ഇറക്കുമതി ഇനിയും വര്‍ധിക്കുമെന്നു വിദഗ്ധര്‍ പറയുന്നു.