തിരുവനന്തപുരം: യു.ഡി.എഫ്  നടത്തുന്ന സ്പീക്ക് അപ്പ് കേരളയുടെ മൂന്നാംഘട്ട സമരപരിപാടി ചൊവ്വാഴ്ച. തിരുവനന്തപുരത്ത് സെക്രട്ടേറിയറ്റിനു മുന്നിലും മറ്റു ജില്ലകളില്‍ കലക്ടറേറ്റുകള്‍ക്കു മുന്നിലുമാണ് സത്യഗ്രഹം.

മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറി ഉള്‍പ്പെട്ട സ്വര്‍ണക്കള്ളക്കടത്ത്, ലൈഫ് മിഷനിലെ കോഴ, പ്രളയത്തട്ടിപ്പ്, പിന്‍വാതില്‍ നിയമനം, സര്‍ക്കാരിന്റെ അഴിമതികള്‍ എന്നിവ സി.ബി.ഐ അന്വേഷിക്കുക, എന്‍.ഐ.എ ചോദ്യം ചെയ്ത മന്ത്രി കെ.ടി ജലീലിനെ പുറത്താക്കുക, മുഖ്യമന്ത്രി പിണറായി വിജയന്‍ രാജിവയ്ക്കുക തുടങ്ങിയ ആവശ്യങ്ങള്‍ ഉന്നയിച്ചുള്ള സമരപരമ്പരയുടെ മൂന്നാംഘട്ടമാണ് നാളത്തേത്. 

സെക്രട്ടേറിയറ്റിനു മുന്നിലെ സത്യഗ്രഹം പ്രതിപക്ഷനേതാവ് രമേശ് ചെന്നിത്തല ഉദ്ഘാടനം ചെയ്യും. വിവിധ ജില്ലകളില്‍ മറ്റു യു.ഡി.എഫ് നേതാക്കളും ഉദ്ഘാടനം നിര്‍വഹിക്കും. 

കൊവിഡ് പ്രോട്ടോക്കോള്‍ പാലിച്ചുകൊണ്ടായിരിക്കും പരിപാടി സംഘടിപ്പിക്കുകയെന്ന് യു.ഡി.എഫ് കണ്‍വീനര്‍ ബെന്നി ബഹനാന്‍ അറിയിച്ചു.