വെള്ളറട: ലാലുവിന്റെ കൈകളില്‍ സ്വര്‍ണ നാഗവും ഭദ്രം. പ്രശസ്ത പരിസ്ഥിതി പ്രവര്‍ത്തകനും, പാമ്പു സംരക്ഷകനുമായ ഉണ്ടന്‍കോട് ലാലുവാണ് സ്വര്‍ണനാഗ(ഗോള്‍ഡന്‍ കോബ്ര)ത്തെ പിടികൂടിയത്. ബാലരാമപുരം വഴിമുക്ക് എന്‍.കെ മന്‍സിലില്‍ റഫീക്കിന്റെ പുരയിടത്തില്‍ നിന്നാണ് സ്വര്‍ണനാഗത്തെ ലാലു പിടികൂടിയത്. പത്ത് വയസോളം പ്രായമുള്ള ഈ പാമ്പ് റഫീക്കിന്റെ വളര്‍ത്തുനായെയും കടിച്ചു കൊന്നിരുന്നു. പാമ്പ് ഗവേഷണം തുടരുന്ന ലാലു വനംവകുപ്പിലെ താല്‍ക്കാലിക ജീവനക്കാരനാണ്. പ്രൊഫഷണല്‍ മിമിക്രി കലാകാരനും കീബോഡിസ്റ്റുമായ ലാലു അയ്യായിരത്തിലേറെ പാമ്പുകളെ ഇതുവരെ പിടിച്ചിട്ടുണ്ട്. ഇവയെ സംരക്ഷിത വനമേഖലയിലേക്കു തുറന്നുവിടുകയാണ് ചെയ്യുന്നത്.