തിരുവനന്തപുരം: സംസ്ഥാനത്തെ സ്‌കൂളുകളില്‍ അടുത്ത അധ്യയന വര്‍ഷത്തേക്കുള്ള അഡ്മിഷന്‍ ആരംഭിച്ച സാഹചര്യത്തില്‍ പ്രവേശനവുമായി ബന്ധപ്പെട്ട് ജാഗ്രത വേണമെന്ന് അധികൃതര്‍ അറിയിച്ചു. പൊതുവിദ്യാഭ്യാസ വകുപ്പിനു കീഴില്‍ എയ്ഡഡ് സ്‌കൂളുകളിലും ഗവണ്‍മെന്റ് സ്‌കൂളുകളിലും പ്രവേശന പരീക്ഷ നടത്താതെ കുട്ടികളെ പ്രവേശിപ്പിക്കണം എന്നാണ് നിയമം. എന്നാല്‍ ചില എയ്ഡഡ് സ്‌കൂളുകളില്‍ പ്രവേശന പരീക്ഷ നടത്തുന്നതായി ശ്രദ്ധയില്‍പ്പെട്ടിട്ടുണ്ട്. പി.ടി.എ ഫണ്ട്, കംപ്യൂട്ടര്‍ ഫീസ്, പാഠപുസ്തകം, യൂനിഫോം എന്നിങ്ങനെ എന്തെങ്കിലും കാരണങ്ങള്‍ പറഞ്ഞ് കാശുപിരിക്കാനുള്ള ആദ്യപടിയാണ് ഇത്. പ്രവേശന പരീക്ഷ നടത്തുകയോ റാങ്ക് ലിസ്റ്റ് ഇടുകയോ അഡ്മിഷനു മേല്‍പറഞ്ഞ ഏതെങ്കിലും തരത്തില്‍ പണം ആവശ്യപ്പെടുകയോ ചെയ്താല്‍ ഹെഡ്മാസ്റ്റര്‍ക്കെതിരേ നടപടിയുണ്ടാകും.

സ്‌കൂളുകളെ മാതൃകയാക്കി ചിലര്‍ നടത്തുന്ന ഇത്തരം ക്രമക്കേടുകളെ പ്രതിരോധിക്കാന്‍ മാതാപിതാക്കള്‍ ശ്രദ്ധിക്കണമെന്നും പൊതുവിദ്യാഭ്യാസ വകുപ്പ് അറിയിച്ചു. സ്‌കൂള്‍ പ്രവേശനത്തിനു വാങ്ങാവുന്ന പരമാവധി തുക നൂറു (100-) രൂപ പി.ടി.എ ഫണ്ട് മാത്രമാണ്. ചൂഷണത്തിനു വിധേയരാകുന്നവര്‍ക്ക് വിജിലന്‍സ് ഓഫിസര്‍ക്കോ (ഫോണ്‍: 0471-305393) പൊതുവിദ്യാഭ്യാസ ഡയരക്ടര്‍ക്കോ (0471-2325106,2324601) പൊതുവിദ്യാഭ്യസ സെക്രട്ടറിക്കോ (0471-2331509, 2518997) പരാതി നല്‍കാം. ജില്ലാ വിജിലന്‍സ് ഓഫിസ് നമ്പരുകള്‍ തിരുവനന്തപുരം- 0471 2304119, കൊല്ലം- 0474 2795092, പത്തനംതിട്ട- 0468 2223270, കോട്ടയം - 0481 2585144, ആലപ്പുഴ - 0477 2237016, ഇടുക്കി - 0486 2256611, എറണാകുളം-0484 2336100, തൃശൂര്‍ - 0487 2334200, പാലക്കാട് - 0491 2548510, കോഴിക്കോട് - 0495 2743207, മലപ്പുറം - 0483 2734910, വയനാട് - 0493 6247310, കണ്ണൂര്‍ - 0497 2707778, കാസര്‍കോട് - 0499 4255889.