മലപ്പുറം: തുടര്‍ച്ചയായി മുസ്‌ലിം വിരുദ്ധ പ്രസ്താവനകള്‍ നടത്തിവരുന്ന കൊച്ചി ബിഷപ്പ് ഡോ. ജോസഫ് കരിയില്‍, സെഹിയോന്‍ മിനിസ്ട്രീസ് ഡയറക്ടര്‍ ഫാ. സേവ്യര്‍ഖാന്‍ വട്ടായില്‍ എന്നിവര്‍ക്കെതിരേ വിമര്‍ശനങ്ങളുമായി കത്തോലിക്കാ മുഖപത്രം സത്യദീപം. വെറുപ്പും അപരവിദ്വേഷവും വളര്‍ത്തുന്ന വേദികളില്‍ അതു വിളമ്പാതിരിക്കാനുള്ള ഔചിത്യമെങ്കിലും സഭാനേതൃത്വത്തിനും അംഗങ്ങള്‍ക്കും ഉണ്ടാകണ്ടേതുണ്ടെന്ന് ഏറ്റവും പുതിയ ലക്കം സത്യദീപത്തില്‍ എഴുതിയ മുഖപ്രസംഗത്തില്‍ ഓര്‍മിപ്പിക്കുന്നു. തങ്ങളെ സ്വീകരിക്കാന്‍ തയാറാകാതിരുന്ന സമരിയാക്കാരുടെ മേല്‍ അഗ്‌നിവര്‍ഷമുണ്ടാകട്ടെയെന്ന് ആക്രോശിച്ച യേശുവിന്റെ ശിഷ്യന്‍ യോഹന്നാനെയും അതിനോട് യേശു പ്രതികരിച്ച രീതിയും 'യോഹന്നാനെ തടയാത്ത സഭ' എന്ന തലക്കെട്ടില്‍ ചൂണ്ടിക്കാട്ടി, അത്തരം യോഹന്നാന്മാരെ സഭ തടയണമെന്നാണ് മുഖപ്രസംഗത്തിലൂടെ ആവശ്യപ്പെടുന്നത്.

ആരുടെയും പേരുകള്‍ മുഖപ്രസംഗത്തില്‍ പരാമര്‍ശിച്ചിട്ടില്ലെങ്കിലും ജോസഫ് കരിയിലും സേവ്യര്‍ഖാന്‍ വട്ടായിലും ഈയടുത്തായി നടത്തിയ കടുത്ത വിദ്വേഷപ്രസ്താവനകളാണ് മുഖപ്രസംഗത്തിന്റെ പശ്ചാത്തലമെന്ന് കത്തോലിക്കാ കേന്ദ്രങ്ങള്‍ പറഞ്ഞു. ലത്തീന്‍ കത്തോലിക്ക വിഭാഗത്തിന്റെ ഉന്നത നയരൂപീകരണ സമിതിയായ കെ.ആര്‍.എല്‍.സി.സിയുടെയും ലത്തീന്‍ കത്തോലിക്ക മെത്രാന്‍സമിതിയുടെയും അധ്യക്ഷനാണ് ജോസഫ് കരിയില്‍.
കേരളത്തില്‍ ജിഹാദി ഗ്രൂപ്പുകളുമായി രാഷ്ട്രീയക്കാരും ചിന്തകരും മാധ്യമങ്ങളും അന്തര്‍ധാരയിലാണെന്നായിരുന്നു സേവ്യര്‍ ഖാന്റെ വിവാദമായ ഒരു പ്രസ്താവന. കേരളത്തിലേക്ക് മുസ്‌ലിം കുടിയേറ്റമുണ്ടായാല്‍ ഇവിടുത്തെ സന്തുലിതാവസ്ഥ നഷ്ടപ്പെടുമെന്നും സേവ്യര്‍ ഖാന്‍ പ്രസംഗിക്കുകയുണ്ടായി. കേരളത്തില്‍ ക്രിസ്ത്യന്‍ വംശഹത്യനടക്കുകയാണെന്നതുള്‍പ്പെടെയുള്ള അദ്ദേഹത്തിന്റെ പ്രസംഗങ്ങള്‍ സംഘ്പരിവാര കേന്ദ്രങ്ങള്‍ വന്‍തോതില്‍ പ്രചരിപ്പിക്കുകയും ചെയ്തിരുന്നു.

സേവ്യര്‍ഖാന്റെ പരാമര്‍ശങ്ങളെ പിന്തുണക്കുന്ന വിധത്തിലായിരുന്നു ജോസഫ് കരിയലിന്റെ പ്രസ്താവനകള്‍. മുസ്‌ലിംലീഗിനെ അതിനീചമായ ഭാഷയില്‍ വിമര്‍ശിക്കുന്ന ജോസഫ് കരിയലിന്റെ പ്രസംഗങ്ങളും സോഷ്യല്‍ മീഡിയയില്‍ പ്രചരിക്കുന്നുണ്ട്. രണ്ടുപേരുടെയും മുസ്‌ലിം വിരുദ്ധ പരാമര്‍ശങ്ങള്‍ വ്യാപകവിമര്‍ശനത്തിന് വഴിവച്ചെങ്കിലും ഇരുവരും അവ തിരുത്തിയിരുന്നില്ല. ഒരുവിഭാഗം ക്രൈസ്തവ നേതൃത്വം സംഘ് പരിവാറുമായി അടുക്കുന്നതിന്റെ ഭാഗമായുള്ള നീക്കങ്ങളായും ഇതിനെ ചൂണ്ടിക്കാട്ടിയിരുന്നു. ഇതിനിടെയാണ് പ്രസംഗങ്ങളെ തള്ളിപ്പറഞ്ഞും അവരെ തിരുത്താന്‍ നേതൃത്വം തയാറാവണമെന്നും ആവശ്യപ്പെട്ട് സത്യദീപം മുഖപ്രസംഗം എഴുതിയിരിക്കുന്നത്.