കൊണ്ടോട്ടി: ഇന്ത്യയില്‍ നിന്ന് ഈ വര്‍ഷം ഹജ്ജ് തീര്‍ഥാടനത്തിന് അവസരം ലഭിച്ചവരില്‍ മക്ക ഹറം ശരീഫിന് സമീപം താമസ സൗകര്യം ആവശ്യപ്പെട്ട് അപേക്ഷിച്ച 13,147 പേരെ അസീസിയ്യ കാറ്റഗറിയിലേക്ക് മാറ്റും. മതിയായ കെട്ടിട സൗകര്യം മക്കക്ക് സമീപം ലഭിക്കാത്തതിനെ തുടര്‍ന്നാണിത്. മക്കക്ക് സമീപം താമസം ലഭ്യമാകുന്ന ഒന്നാം കാറ്റഗറിയില്‍ 25,147 പേരാണ് ആകെ അപേക്ഷിച്ചിരുന്നത്. ഇവരില്‍ 12,000 പേര്‍ക്ക് മാത്രമാണ് താമസ സൗകര്യം ലഭ്യമായത്. ഒന്നാം കാറ്റഗറിയിലുള്ള വരില്‍ നിന്ന് നറുക്കെടുപ്പ് നടത്തിയാണ് 12,000 പേര്‍ക്ക് അവസരം നല്‍കുക. ശേഷിക്കുന്നവരെ അസീസിയ്യയിലേക്ക് മാറ്റും.

താമസ സൗകര്യം കുറവായതിനാല്‍ ഒന്നാം കാറ്റഗറിയില്‍ അപേക്ഷ നല്‍കിയ തീര്‍ഥാടകര്‍ക്ക് സ്വയം അസീസിയ്യയിലേക്ക് മാറാന്‍ അവസരം നല്‍കുന്നുണ്ട്. ഈ മാസം 17 വരെ ഇതിനായി അപേക്ഷിക്കാം. ഇത് സംബന്ധിച്ചുളള വിവരങ്ങള്‍ ഹജ്ജ് വെബ്‌സൈറ്റില്‍ ലഭ്യമാണ്.

മക്കയുടെ ഒന്നര കിലോമീറ്റര്‍ ചുറ്റളവിലാണ് ഒന്നാം കാറ്റഗറി. മുന്‍വര്‍ഷങ്ങളില്‍ ഗ്രീന്‍ കാറ്റഗറിയായാണ് ഇതറിയപ്പെട്ടിരുന്നത്. മക്കയിലെ തിരക്കും മറ്റും മുന്‍നിര്‍ത്തിയാണ് ഒന്നാം കാറ്റഗറിയില്‍ താമസ സൗകര്യം കുറക്കുന്നത്. അഞ്ച് മുതല്‍ ഏഴ് കിലോമീറ്റര്‍ ചുറ്റളവിലാണ് അസീസിയ്യ കാറ്റഗറി. മതിയായ സൗകര്യങ്ങളും മക്കയിലെത്താന്‍ വാഹന സൗകര്യവും ഇവിടെ ലഭ്യമാണ്.
ഇന്ത്യയില്‍ നിന്ന് ഈ വര്‍ഷം 1,40,000 പേരാണ് വിവിധ സംസ്ഥാന ഹജ്ജ് കമ്മിറ്റികള്‍ക്ക് കീഴില്‍ തീര്‍ഥാടനത്തിന് പോകുന്നത്. ഇവര്‍ പണം അടച്ച് ഹജ്ജ് പഠന പരിശീലന ക്ലാസുകളില്‍ പങ്കെടുത്തുവരികയാണ്. ജൂലൈ നാലുമുതലാണ് ഇന്ത്യയില്‍ നിന്ന് ഹജ്ജ് സര്‍വിസുകള്‍ ആരംഭിക്കുന്നത്.