ടോക്കിയോ: തെക്കന്‍ ചൈന കടലില്‍ കരുത്തറിയിച്ച് ഇന്ത്യയുള്‍പ്പെടെ നാല് രാജ്യങ്ങളുടെ നാവിക അഭ്യാസ പ്രകടനം. ചൈനക്ക് വെല്ലുവിളിയുയര്‍ത്തിയുള്ള അഭ്യാസ പ്രകടനത്തില്‍ ഇന്ത്യക്ക് പുറമെ യു.എസ്, ഫിലിപ്പൈന്‍സ്, ജപ്പാന്‍ എന്നിവയാണ് പങ്കെടുത്തത്. ജപ്പാന്റെ വിമാനവാഹിനിക്കപ്പല്‍, ഇന്ത്യയുടെ എ.എന്‍.എസ് കൊല്‍ക്കത്ത, ടാങ്കര്‍ ഐ.എന്‍.എസ് ശക്തി തുടങ്ങിവ സംയുക്താഭ്യാസത്തില്‍ പങ്കെടുത്തു.

ഒരാഴ്ച നീണ്ട നാവിക അഭ്യാസം കഴിഞ്ഞ ദിവസമാണ് സമാപിച്ചത്. തെക്കന്‍ ചൈനയിലെ ദ്വീപുകള്‍ക്ക് സമീപം യു.എസിന്റെ രണ്ട് യുദ്ധക്കപ്പലുകള്‍ വിന്യസിച്ചതിനെതിരേ പ്രതിഷേധവുമായി ചൈന രംഗത്തെത്തിയിരുന്നു. തങ്ങളുടെ പരമാധികാരത്തിന് നേരെയുള്ള കടന്നുകയറ്റമാണിതെന്ന് ചൈന കുറ്റപ്പെടുത്തി.
എന്നാല്‍ അന്താരാഷ്ട്ര ജല അതിര്‍ത്തിയിലൂടെ ലോകത്തിലുടനീളം സഞ്ചരിക്കാനുള്ള സ്വാതന്ത്ര്യം തങ്ങള്‍ക്കുണ്ടെന്ന് യു.എസ് നാവികസേന പ്രതികരിച്ചു.