തിരുവനന്തപുരം: 50 മൈക്രോണില്‍ താഴെയുള്ള പ്ലാസ്റ്റിക് ഉല്‍പ്പന്നങ്ങള്‍ നിരോധിച്ചതിന്റെ ഭാഗമായി നഗരസഭാ പരിധിയില്‍ ഹെല്‍ത്ത് ഇന്‍സ്‌പെക്ടര്‍മാര്‍ നടത്തുന്ന പരിശോധനകള്‍ നിര്‍ത്തിവയ്ക്കണമെന്ന് വ്യാപാരികള്‍.
നേരത്തെ ആവശ്യപ്പെട്ടതു പോലെ ഓണംവരെ സാവകാശം അനുവദിക്കണമെന്നും വ്യാപാരികള്‍ ആവശ്യപ്പെട്ടു. മേയര്‍ വിളിച്ചുചേര്‍ത്ത ചര്‍ച്ചയിലാണ് ആവശ്യം ഉന്നയിച്ചത്. പ്ലാസ്റ്റിക് നിരോധനത്തിനും നഗരത്തെ ശുചിത്വപൂര്‍ണമാക്കുന്നതിനും എല്ലാ പിന്തുണയും നല്‍കുമെന്ന് വ്യാപാരികള്‍ പറഞ്ഞു.
എന്നാല്‍ യാതൊരു മുന്നൊരുക്കവുമില്ലാതെ നിരോധനം ധൃതിയില്‍ അടിച്ചേല്‍പ്പിക്കുന്നത് അംഗീകരിക്കാനാകില്ല. ഹോളോഗ്രാം സംവിധാനത്തിന്റെ പോരായ്മകള്‍ ഉദ്യോഗസ്ഥരുമായി ചര്‍ച്ച ചെയ്ത് കുറ്റമറ്റതാക്കാമെന്ന് മേയര്‍ ചര്‍ച്ചയില്‍ ഉറപ്പുനല്‍കി.
 അതേസമയം, ചര്‍ച്ചയ്ക്കു ശേഷം വ്യാപാരി വ്യവസായി ഏകോപന സമിതി ഭാരവാഹികളുടെ യോഗത്തില്‍ നഗരസഭയ്‌ക്കെതിരേ കടുത്ത വിമര്‍ശനമാണ് ഉയര്‍ന്നത്. തങ്ങളുടെ ഭാഗം കേള്‍ക്കാതെ ധിക്കാരപൂര്‍വമാണ് മേയറും ഭരണസമിതിയും പ്രവര്‍ത്തിക്കുന്നതെന്നു ഭാരവാഹികള്‍ യോഗത്തില്‍ അഭിപ്രായപ്പെട്ടു. ഓണംവരെ പരിശോധനയും നിരോധനത്തില്‍ ഇളവും നല്‍കിയില്ലെങ്കില്‍ അടുത്ത ദിവസം മുതല്‍ അനിശ്ചിതകാലത്തേക്ക് കടകള്‍ അടച്ചിടാന്‍ യോഗം തീരുമാനിച്ചു.