തെഹ്‌റാന്‍: യു.എസും ഇറാനും തമ്മില്‍ യുദ്ധമുണ്ടാവുകയാണെങ്കില്‍ മേഖലയിലെ യു.എസ് സൈനികതാവളങ്ങള്‍ ആക്രമിക്കുമെന്ന് ഇറാന്‍ വിപ്ലവ ഗാര്‍ഡ് മേധാവി മേജര്‍ ജനറല്‍ ഹുസൈന്‍ സലാമി. അതിനു പറ്റിയ വിമാനങ്ങള്‍ ഇറാന്റെ പക്കലുണ്ടെന്നും ദീര്‍ഘകാല യുദ്ധത്തിന് ഒരുക്കങ്ങള്‍ നടത്തിയിട്ടുണ്ടെന്നും അദ്ദേഹം വ്യക്തമാക്കി.

ഇറാനെതിരായ യുദ്ധം യു.എസിന് താങ്ങാനാവാത്ത നഷ്ടമുണ്ടാക്കും. കര-നാവിക-വ്യോമ യുദ്ധത്തിലൂടെ യു.എസിനെ പരാജയപ്പെടുത്താന്‍ ഇറാന്‍ സേനയെ ശക്തിപ്പെടുത്തിയിട്ടുണ്ടെന്നും സലാമി മുന്നറിയിപ്പു നല്‍കി. 

യു.എസിനെതിരേ ഏതെങ്കിലും തരത്തില്‍ ഇറാന്‍ ആക്രമണം നടത്തിയാല്‍ ആയിരം മടങ്ങ് ശക്തമായ തിരിച്ചടി നല്‍കുമെന്ന് പ്രസിഡന്റ് ട്രംപ് ഭീഷണിപ്പെടുത്തിയതിനു പിന്നാലെയാണ് ഇറാനിലെ റവല്യൂഷനറി ഗാര്‍ഡിന്റെ മുന്നറിയിപ്പ്. നേരത്തെ ഖുദ്‌സ് സേനാ മേധാവി ഖാസിം സുലൈമാനിയുടെ വധത്തിനു പകരം ദക്ഷിണാഫ്രിക്കയിലെ യു.എസ് അംബാസഡറെ കൊലപ്പെടുത്താന്‍ ഇറാന്‍ പദ്ധതിയിടുന്നതായി റിപ്പോര്‍ട്ടുണ്ടായിരുന്നു. എന്നാല്‍ ഇത് നിഷേധിച്ച ഇറാന്‍ സുലൈമാനിയുടെ വധത്തിനു പിന്നില്‍ പ്രവര്‍ത്തിച്ചവര്‍ക്ക് ശിക്ഷ നല്‍കുമെന്ന് വ്യക്തമാക്കിയിരുന്നു.