ഫറോക്ക്: ബസ് യാത്രയ്ക്കിടെ കളഞ്ഞു പോയ പണവും സ്വര്‍ണവുമടങ്ങിയ ബാഗ് പൊലിസ് ഇടപെട്ടു ഉടമയ്ക്കു തിരിച്ചു നല്‍കി. അത്തോളി വെള്ളമ്പറമ്പത്ത് ഷാജഹാന്റെ ഭാര്യ റഫീനയുടെ ഹാന്‍ഡ് ബാഗാണ് കളഞ്ഞുപോയത്.
കോഴിക്കോട് പുതിയ സ്റ്റാന്‍ഡില്‍ നിന്നു വേങ്ങരയിലേക്ക് പോകുന്ന ഗോള്‍ഡന്‍ പ്ലാസ ബസില്‍ തിരുവണ്ണൂരിലേക്ക് വരികയായിരുന്നു ഇവര്‍. തിരക്കുള്ള ബസില്‍ തോളില്‍ തൂക്കിയിട്ടിരുന്ന ബാഗ് വീണുപോയി. 25,000 രൂപയും ഒരു പവന്‍ സ്വര്‍ണാഭരണവുമാണ് ബാഗിലുണ്ടായിരുന്നത്. ബാഗ് കളഞ്ഞുപോയതിനെ തുടര്‍ന്നു പന്നിയങ്കര പൊലിസ് സ്റ്റേഷനില്‍ അറിയിച്ചു. പൊലിസ് ഉടന്‍ രാമനാട്ടുകര എയ്ഡ് പോസ്റ്റില്‍ വിവരമറിയിച്ചു. എയ്ഡ് പോസ്റ്റ് എസ്.ഐ സി.കെ അരവിന്ദനും ബസുകാരെ വിവരമറിയിക്കുകയും ജീവനക്കാര്‍ ബാഗ് കണ്ടെത്തി പൊലിസിനു കൈമാറുകയുമായിരുന്നു.