ന്യൂഡല്‍ഹി: പാര്‍ലമെന്റിന് മുന്നില്‍ പ്രതിഷേധിക്കുന്ന എം.പിമാര്‍ക്ക് ചായയുമായി ചെന്ന രാജ്യസഭാ ഉപാധ്യക്ഷന്റെ നടപടിയെ പ്രകീര്‍ത്തിച്ച് പ്രധാനമന്ത്രി. രാജ്യസഭാ ഉപാധ്യക്ഷന്‍ ഹരിവന്‍ശ് വിശാലമായ മനസ്സിന്റെ ഉടമയാണെന്നാണ് ഇതില്‍ നിന്ന് മനസ്സിലാക്കാന്‍ കഴിയുന്നതെന്ന് പ്രധാനമന്ത്രി ട്വീറ്റ് ചെയ്തു. തന്നെ അപമാനിച്ചവര്‍ക്ക് അതൊന്നും വകവെക്കാതെ അദ്ദേഹം നേരിട്ട് ചായകൊണ്ടുപോയി കൊടുത്തത് അദ്ദേഹത്തിന്റെ വിനയത്തെയാണ് കാണിക്കുന്നത്- മോദി ട്വീറ്റ് ചെയ്തു.

കാര്‍ഷിക ബില്ലിനെതിരായ പ്രതിഷേധത്തെ തുടര്‍ന്ന് സസ്‌പെന്‍ഡ് ചെയ്യപ്പെട്ട എം.പിമാര്‍ പാര്‍ലമെന്റിന് മുന്നില്‍ സമരത്തിലാണ്. ഇവര്‍ക്കാണ് ഹരിവന്‍ശ് ചായ നല്‍കിയത്. എന്നാല്‍ കര്‍ഷക വിരുദ്ധന്റെ ചായ തങ്ങള്‍ക്ക് വേണ്ടെന്ന് പറഞ്ഞ് എം.പിമാര്‍ സല്‍ക്കാരം തിരസ്‌ക്കരിക്കുകയാണുണ്ടായത്.

സഭാ ഉപാധ്യക്ഷനെ അപമാനിച്ചുവെന്നാരോപിച്ചായിരുന്നു സസ്‌പെന്‍ഷന്‍. പാര്‍ലമെന്ററി-വിദേശകാര്യ സഹമന്ത്രി വി. മുരളീധരനാണ് എം.പിമാരെ സസ്പെന്‍ഡ് ചെയ്യാനുള്ള പ്രമേയം അവതരിപ്പിച്ചത്.

കേരളത്തില്‍ നിന്നുള്ള സി.പി.ഐ.എം എം.പിമാരായ കെ.കെ രാഗേഷ്, എളമരം കരീം എന്നിവരടക്കം എട്ട് പേരെയാണ് രാജ്യസഭയില്‍ നിന്ന് പുറത്താക്കിയത്. ഡെറിക് ഒബ്രയാന്‍, സഞ്ജയ് സിംഗ്, രാജു സതവ്, റിപുന്‍ ബോറ, ഡോല സെന്‍, സയ്യീദ് നാസിര്‍ ഹുസൈന്‍ എന്നിവരാണ് സസ്‌പെന്‍ഷന്‍ നേരിട്ട മറ്റ് എം.പിമാര്‍.

പാര്‍ലമെന്റിന് മുന്നില്‍ കഴിഞ്ഞ ദിവസം രാത്രി ആരംഭിച്ച സമരം ഇപ്പോഴും തുടരുകയാണ്. രാത്രി മുഴുവന്‍ എം.പിമാര്‍ അവിടെ തന്നെ ചെലവഴിക്കുകയായിരുന്നു. രാവിലെ അഞ്ച് മണിയോടെ കെ.കെ രാഗേഷ് എം.പി ഗാന്ധി പ്രതിമക്ക് മുന്നില്‍ നിന്നുള്ള വീഡിയോ ഫേസ്ബുക്കില്‍ പങ്കുവെച്ചിട്ടുണ്ട്.