മദീന: ലോകത്തെ ഏറ്റവും വലിയ ഖുര്‍ആന്‍ പ്രിന്റിങ് പ്രസ്സ് ആയ മദീന കിംഗ് ഫഹദ് മുസ്ഹഫ് പ്രിന്റിംഗ് കോംപ്ലക്സ് മദീന മുസ്ഹഫ് ആപ്പ് പുറത്തിറക്കി. ഇസ്ലാമികകാര്യ മന്ത്രിയും കിംഗ് ഫഹദ് മുസ്ഹഫ് പ്രിന്റിംഗ് കോംപ്ലക്സ് സൂപ്പര്‍വൈസര്‍ ജനറലുമായ ശൈഖ് ഡോ.അബ്ദുല്ലത്തീഫ് ആലുശൈഖ് റിയാദില്‍ മന്ത്രാലയ ആസ്ഥാനത്ത് സംഘടിപ്പിച്ച ചടങ്ങിലാണ് ആപ്പ് ഉദ്ഘാടനം ചെയ്തത്. ആന്‍ഡ്രോയ്ഡ്, ഐ.ഒ.എസ് പ്ലാറ്റ്ഫോമുകളില്‍ പ്രവര്‍ത്തിക്കുന്ന ആപ്പിന്റെ ആദ്യ പതിപ്പാണ് പുറത്തിറക്കിയിരിക്കുന്നത്. ലോകത്തെ ഏറ്റവും വലിയ ഖുര്‍ആന്‍ അച്ചടിശാലയാണ് മദീനയിലേത്. ഇവിടെ നിന്നും പുറത്തിറക്കുന്ന ഖുര്‍ആന്‍ കോപ്പികള്‍ ലോകത്തെങ്ങും മുസ്ലിംകള്‍ക്കിടയില്‍ സൗജന്യമായി വിതരണം ചെയ്യുന്നു. പിഴവുകളോ പോരായ്മകളോ ഇല്ലാത്ത, പൂര്‍ണമായും വിശ്വസിക്കാവുന്ന ഖുര്‍ആന്‍ കോപ്പികളാണ് ഇവിടെ അച്ചടിക്കുന്നത്.
മദീന ഖുര്‍ആന്‍ പ്രിന്റിങ് പ്രസില്‍ നിന്നും ഈ വര്‍ഷം ഇതുവരെ 1.8 കോടി മുസ്ഹഫ് കോപ്പികള്‍ അച്ചടിച്ചിട്ടുണ്ട്. ഇവ സഊദി അറേബ്യക്കകത്തും വിദേശത്തും വിതരണം ചെയ്തു. വിഷന്‍-2030 പദ്ധതി ലക്ഷ്യങ്ങള്‍ക്കനുസൃതമായി, ഇസ്ലാമിനും മുസ്ലിംകള്‍ക്കും സേവനം നല്‍കുന്ന വിഷയത്തില്‍ എല്ലാ പുതിയ കാര്യങ്ങളുമായും ഇസ്ലാമികകാര്യ മന്ത്രാലയം സമരസപ്പെട്ടു പോകുന്നു. ഇതിന്റെ അടിസ്ഥാനത്തിലാണ് കിംഗ് ഫഹദ് മുസ്ഹഫ് പ്രിന്റിംഗ് കോംപ്ലക്സ് ഉദ്യോഗസ്ഥരുടെ മേല്‍നോട്ടത്തില്‍ മുസ്ഹഫ് ആപ്പ് വികസിപ്പിക്കുന്നതിന് സൗദി കമ്പനിയുമായി കരാര്‍ ഒപ്പു വച്ചത്. ലോകത്തുള്ള മുഴുവന്‍ മുസ്ലിംകള്‍ക്കും പുതിയ ആപ്പ് പ്രയോജനപ്പെടും. കിംഗ് ഫഹദ് മുസ്ഹഫ് പ്രിന്റിംഗ് കോംപ്ലക്സ് തയാറാക്കിയ ഖുര്‍ആന്‍ വ്യാഖ്യാനങ്ങള്‍, വ്യത്യസ്തമായ ശൈലികളിലുള്ള ഖുര്‍ആന്‍ പാരായണങ്ങള്‍, ഏഴു ഭാഷകളിലുള്ള ഖുര്‍ആന്‍ വിവര്‍ത്തനങ്ങള്‍, ഖുര്‍ആനിന്റെ പൂര്‍ണ ശബ്ദ വിവര്‍ത്തനം, ഖുര്‍ആന്‍ കോപ്പികള്‍ എന്നിവ അടങ്ങിയ ആപ്പ് അറബി, ഇംഗ്ലീഷ്, ഫ്രഞ്ച്, സ്പാനിഷ്, ജര്‍മന്‍, ഇറ്റാലിയന്‍, ജപ്പാനീസ്, ഇന്തോനേഷ്യ, ഉര്‍ദു, പേര്‍ഷ്യന്‍, തുര്‍ക്കി, സവാഹിലി, ഹോസാ എന്നീ പതിമൂന്നു ഭാഷകള്‍ സപ്പോര്‍ട്ട് ചെയ്യും. ഫാസ്റ്റ് സെര്‍ച്ച് സേവനമടക്കം മറ്റു പ്രത്യേകതകളും ആപ്പിലുണ്ട്.