തൊടുപുഴ: ഇടുക്കി മെഡിക്കല്‍ കോളജിനു വേണ്ടി കേന്ദ്രസര്‍ക്കാര്‍ അനുവദിച്ച തുക വേണ്ട രീതിയില്‍ വിനിയോഗിക്കാതെ മാറി മാറി വന്ന ഇടതു - വലതു മുന്നണികള്‍ ജനങ്ങളെ കബളിപ്പിക്കുകയാണെന്ന് ബി.ജെ.പി ഇടുക്കി ജില്ലാ ഭാരവാഹികള്‍ വാര്‍ത്താ സമ്മേളനത്തില്‍ ആരോപിച്ചു. എല്‍.ഡി.എഫ് സര്‍ക്കാര്‍ അധികാരത്തില്‍ വന്നതിനു ശേഷം ചെയ്യാവുന്ന കാര്യങ്ങളൊന്നും ചെയ്തിട്ടില്ല.
സ്വകാര്യ ആശുപത്രികളെ സഹായിക്കുന്ന നീക്കങ്ങളാണ് ഇപ്പോള്‍ എല്‍.ഡി.എഫിന്റെ ഭാഗത്തുനിന്നും ഉണ്ടായിട്ടുള്ളത്.  ജാള്യത മറയ്ക്കാനാണ് യു.ഡി.എഫ് ഹര്‍ത്താല്‍ പ്രഖ്യാപിച്ചിരിക്കുന്നത്.
മെഡിക്കല്‍ കോളജിന് അംഗീകാരം ലഭിക്കുന്നതിന് ആവശ്യമായ നിര്‍മാണപ്രവര്‍ത്തനങ്ങള്‍ നടത്തി, സത്വരനടപടികള്‍ സ്വീകരിക്കണമെന്ന് ബി.ജെ.പി  ജില്ലാ പ്രസിഡന്റ് ബിനു ജെ. കൈമള്‍, സംസ്ഥാന സമതി അംഗം പി. എ വേലുക്കുട്ടന്‍, കെ.എസ് അജി, പി.ആര്‍ വിനോദ്, സി.എസ്. ശശിധരന്‍ പിള്ള എന്നിവര്‍ ആവശ്യപ്പെട്ടു.