ന്യൂഡല്‍ഹി: ഫെബ്രുവരിയിലെ ഡല്‍ഹി വംശഹത്യയില്‍ ഫേസ്ബുക്കിന്റെ പങ്ക് സംബന്ധിച്ച് അന്വേഷണം നടത്തുന്ന ഡല്‍ഹി അസംബ്ലി സമിതിക്ക് മുന്‍പാകെ ബുധനാഴ്ച ഹാജരാകാനുള്ള നോട്ടിസിനെതിരേ ഫേസ്ബുക്ക് സുപ്രിം കോടതിയെ സമീപിച്ചു. 

ഈ മാസം 15ന് ഹാജരാകാന്‍ നേരത്തെ നോട്ടിസ് നല്‍കിയിരുന്നെങ്കിലും ഫേസ്ബുക്ക് അതിന് തയാറായിരുന്നില്ല. തുടര്‍ന്ന് ഡല്‍ഹി അസംബ്ലിയുടെ പീസ് ആന്റ് ഹാര്‍മണി സമിതി കഴിഞ്ഞ ദിവസം അന്ത്യശാസനം പുറപ്പെടുവിച്ചിരുന്നു. 

ഇതിനു പിന്നാലെ ഫേസ്ബുക്ക് ഇന്ത്യ വൈസ് പ്രസിഡന്റ് അജിത് മോഹന്‍ സുപ്രിം കോടതിയില്‍ ഹരജി നല്‍കുകയായിരുന്നു. കേസ് ഇന്ന് എസ്.കെ കൗള്‍ അധ്യക്ഷനായ ബെഞ്ച് പരിഗണിക്കും. ഫേസ്ബുക്കിലെ ചില വര്‍ഗീയ പോസ്റ്റുകള്‍ ഡല്‍ഹി വംശഹത്യയ്ക്ക് കാരണമായെന്നും ഇത്തരം പോസ്റ്റുകള്‍ നയത്തിന് എതിരായിട്ടും ഫേസ്ബുക്ക് മന:പൂര്‍വം നീക്കം ചെയ്തില്ലെന്നുമുള്ള പരാതിയുടെ അടിസ്ഥാനത്തിലാണ് സമിതി അന്വേഷണം നടത്തുന്നത്. 

വിഷയം നിലവില്‍ ശശി തരൂരിന്റെ നേതൃത്വത്തിലുള്ള പാര്‍ലമെന്ററി സമിതി അന്വേഷിക്കുന്നതിനാല്‍ അസംബ്ലി സമിതിക്ക് മുന്‍പാകെ ഹാജരാകേണ്ടതില്ലെന്ന നിലപാടാണ് ഫേസ്ബുക്കിന്റെത്.