കുറ്റിപ്പുറം: എല്‍.പി, യു.പി അധ്യാപക തസ്തികയിലേക്ക് അപേക്ഷ നല്‍കിയ പ്രവാസികളായ ഉദ്യോഗാര്‍ഥികളും ആശങ്കയില്‍. കൊവിഡ് പശ്ചാത്തലത്തില്‍ രാജ്യാന്തര വിമാന സര്‍വിസുകള്‍ ഇല്ലാത്തതും ക്വാറന്റൈനില്‍ കഴിയണമെന്നതുമാണ് വിദേശ രാജ്യങ്ങളിലുള്ള അപേക്ഷകരെ ആശങ്കപ്പെടുത്തുന്നത്. നവംബര്‍ ഏഴിന് നടക്കുന്ന യു.പി.എസ്.എ പരീക്ഷക്കാണ് കൂടുതല്‍ പേര്‍ അപേക്ഷ നല്‍കിയിട്ടുളളത്. പരീക്ഷ എഴുതാനായി നാട്ടില്‍ എത്തിയാല്‍ നിര്‍ബന്ധമായും 14 ദിവസം ക്വാറന്റൈനില്‍ കഴിയുകയും തിരിച്ച് ജോലി സ്ഥലങ്ങളില്‍ എത്തിയാല്‍ അവിടെയും ക്വാറന്റൈനില്‍ ഇരിക്കണമെന്നതും ഇവര്‍ നേരിടുന്ന പ്രധാന പ്രശ്‌നമാണ്. പലര്‍ക്കും അവസാന അവസരമാണ് ഈ പരീക്ഷ.  

 

 നിലവിലുള്ള റാങ്ക് ലിസ്റ്റിന്റെ കാലാവധി തീരാന്‍ ഒരു വര്‍ഷത്തിലേറെയുണ്ടായിരിക്കെ പരീക്ഷ നീട്ടിവെക്കണമെന്നാവശ്യപ്പെട്ട് പി.എസ്.സി ചെയര്‍മാന്‍ അടക്കമുള്ളവരെ സമീപിച്ചെങ്കിലും നടപടി ഉണ്ടായിട്ടില്ലെന്ന് ഉദ്യോഗാര്‍ഥികള്‍ പറയുന്നു. ഗള്‍ഫ് രാജ്യങ്ങളിലെയും മാലദ്വീപിലെയും അധ്യാപകരെയാണ് നിലവിലെ പ്രതിസന്ധി രൂക്ഷമായി ബാധിക്കുന്നത്.