നോയിഡ: ഗ്രേറ്റര്‍ നോയിഡയില്‍ നര്‍കോട്ടിക്‌സ് കണ്‍ട്രോള്‍ ബ്യൂറോ നടത്തിയ റെയ്ഡില്‍ 1,800 കിലോ മയക്കുമരുന്ന് പിടികൂടി. രാജ്യത്ത് ഇതുവരെ നടന്ന ഏറ്റവും വലിയ മയക്കുമരുന്ന് വേട്ടയാണിതെന്ന് നര്‍കോട്ടിക്‌സ് ബ്യൂറോ അറിയിച്ചു.

മയക്കുമരുന്നായ മെത്താംഫെറ്റാമൈന്‍ നിര്‍മിക്കാനുപയോഗിക്കുന്ന സ്യൂഡോഎഫഡ്രൈന്‍ എന്ന രാസവസ്തുവും രണ്ടു കിലോ കൊക്കൈനുമാണ് റെയ്ഡില്‍ പിടിച്ചത്. ഇതിന് 25കോടിയോളമാണ് വില. ഗ്രേറ്റര്‍ നോയിഡയിലെ ഒരു ഫാക്ടറി പരിസരത്തുനിന്നാണ് മയക്കുമരുന്ന് പിടികൂടിയത്. മൂന്ന് വിദേശികളെ അറസ്റ്റ് ചെയ്തു. ഡല്‍ഹി ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ വച്ച് സ്യൂഡോഎഫഡ്രൈനുമായി പിടിയിലായ സൗത്ത് ആഫ്രിക്കന്‍ സ്വദേശിനിയെ ചോദ്യം ചെയ്തതില്‍ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് റെയ്‌ഡെന്ന് നര്‍കോടിക്‌സ് ഉദ്യോഗസ്ഥര്‍ അറിയിച്ചു.