ചങ്ങരംകുളം: തങ്ങളുടെ ജന്മദിനങ്ങളില്‍ സഹപാഠികള്‍ക്ക് മധുരം നല്‍കുന്നതിനു പകരം ചെടിച്ചെട്ടി നല്‍കി സ്‌കൂളില്‍ പൂന്തോട്ടമൊരുക്കുകയാണ് ചിയ്യാനൂര്‍ ഗവ:എല്‍.പിസ്‌കൂളിലെ വിദ്യാര്‍ഥികള്‍. പിറന്നാള്‍ ദിനത്തില്‍ മിഠായിയും ലഡുവും വാങ്ങുന്ന പൈസ ഉപയോഗിച്ച് ചെടിച്ചട്ടി വാങ്ങി സ്‌കൂളില്‍ സ്ഥാപിക്കും.
ഓരോ കുട്ടികളുടെയും പേര് അവരവരുടെ ചെടിച്ചട്ടിക്കു മുകളിലെഴുതും. അതു കൊണ്ട് തന്നെ പൂന്തോട്ടത്തിലെ തങ്ങളുടെ ചെടി നക്കാനും സംരക്ഷിക്കാനും ഉടമസ്ഥരായ കുട്ടികള്‍ തന്നെ രംഗത്തുണ്ടാകും. 150 ലധികം കുട്ടികളുള്ള സ്‌കൂളില്‍ ഒരു വര്‍ഷത്തില്‍ അത്ര തന്നെ പൂച്ചട്ടികള്‍ സ്ഥാപിക്കപ്പെടുന്നു. പഠനത്തോടൊപ്പം ഇത്തരം വ്യത്യസ്തങ്ങളായ ശിശു സൗഹൃദ പദ്ധതികള്‍ രൂപീകരിക്കുന്നതില്‍ മുന്‍പന്തിയിലാണ് ചിയ്യാനൂര്‍ ഗവ:എല്‍.പി സ്‌കൂള്‍. പ്രധാനാധ്യാപകന്‍ കെ.സുരേഷ് മാസ്റ്റര്‍, അധ്യാപികമാരായ ജനിത, മിനി, സീനത്ത്, ദീപ്തി എന്നിവരാണ് കുട്ടികള്‍ക്ക് മാര്‍ഗനിര്‍ദേശങ്ങള്‍ നല്‍കുന്നത്.