പെരുമ്പാവൂര്‍: നഗരത്തില്‍ കവര്‍ച്ചക്കായി പദ്ധതിയിടുന്നതിനിടെ വന്‍ കവര്‍ച്ചാ സംഘം അറസ്റ്റില്‍. കീഴ്മാട് നാലാം മൈല്‍ ഭാഗത്ത് നീരേലിയില്‍ വീട്ടില്‍ ഫൈസല്‍ വേങ്ങൂര്‍(33), മുടക്കുഴ കരയില്‍ തൃക്കഭാഗത്ത് തച്ചിലേത്ത് വീട്ടില്‍ സുഭാഷ് (31), പെരുമ്പാവൂര്‍ റിലയന്‍സ് പമ്പിന് സമീപം അമ്മാണ്ടിയില്‍ വീട്ടില്‍ ജോജോ (31) എന്നിവരാണ് പെരുമ്പാവൂര്‍ പൊലിസിന്റെ പിടിയിലായത്.
പ്രതികള്‍ ആലുവ സ്വദേശിയില്‍നിന്ന് സ്വര്‍ണം കവര്‍ച്ച ചെയ്യുന്നതിനായി പോകുകയായിരുന്നെന്ന് സമ്മതിച്ചതായി പൊലിസ് പറഞ്ഞു.
പ്രതികള്‍ സഞ്ചരിച്ചിരുന്ന കാര്‍ പൊലിസ് കസ്റ്റഡിയിലെടുത്തു. കാറിനുള്ളില്‍ നിന്ന് കവര്‍ച്ചക്ക് ഉപയോഗിക്കുന്ന വന്‍ ആയുധശേഖരം കണ്ടെടുത്തു.
ആലുവ റൂറല്‍ പൊലിസ് മേധാവിക്ക് കിട്ടിയ രഹസ്യ വിവരത്തിന്റ അടിസ്ഥാനത്തില്‍ പെരുമ്പാവൂര്‍ ഡിവൈ.എസ്.പി വേണുവിന്റെ നേതൃത്വത്തില്‍ സി.ഐ ബൈജു എം. പൗലോസ്, സബ് ഇന്‍സ്‌പെക്ടര്‍ പി.എ. ഫൈസല്‍, ടി.എം. സൂഫി, ജയകുമാര്‍, നിസാര്‍, ദിലീപ് കുമാര്‍, വിനോദ് ,സുനില്‍ കുമാര്‍, കൃഷ്ണകുമാര്‍, ശ്യാം, ജാബിര്‍ എന്നിവരടങ്ങുന്ന അന്വേഷണ സംഘമാണ് പ്രതികളെ അറസ്റ്റ് ചെയ്തത്. ഇനിയും കൂടുതല്‍ പ്രതികളെ പിടികൂടാനുണ്ടെന്ന് സി.ഐ അറിയിച്ചു. പെരുമ്പാവൂര്‍ കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.