കോഴിക്കോട്: പ്രളയത്താല്‍ ദുരിതമനുഭവിക്കുന്ന കേരളത്തിന് സ്‌നേഹ സാന്ത്വനവുമായി ലക്ഷദ്വീപും. ഹൃദയം തകര്‍ന്ന് കഴിയുന്നവര്‍ക്ക് കൈത്താങ്ങുമായി പവിഴപ്പുറ്റുകളുടെ നാട്ടില്‍ നിന്നും അവര്‍ കഴിഞ്ഞ ദിവസം കേരളത്തിലെത്തി സഹായം കൈമാറി. തങ്ങള്‍ സര്‍വതിനും ആശ്രയിക്കുന്ന കേരളക്കരയിലെ ജനങ്ങള്‍ നേരിട്ട ദുരന്തത്തില്‍ സഹായമേകി മാതൃക തീര്‍ത്തത് എസ്.കെ.എസ്.എസ്.എഫ് ചെത്ത്‌ലത്ത് യൂനിറ്റിലെ പ്രവര്‍ത്തകരാണ്.
സ്വരൂപിച്ച സംഖ്യ എസ്.കെ.എസ്.എസ്.എഫ് സംസ്ഥാന പ്രസിഡന്റ്് പാണക്കാട് സയ്യിദ് ഹമീദലി ശിഹാബ് തങ്ങള്‍ക്ക് കൈമാറി. കുറഞ്ഞ ദിവസം കൊണ്ട് അവര്‍ ശേഖരിച്ച വസ്ത്രങ്ങളും നിത്യോപയോഗ വസ്തുക്കളും ആദ്യഘട്ടത്തില്‍ തന്നെ ദുരന്തബാധിതര്‍ക്കെത്തിച്ചിരുന്നു.
പാണക്കാട് നടന്ന ചടങ്ങില്‍ സംസ്ഥാന ജനറല്‍ സെക്രട്ടറി സത്താര്‍ പന്തലൂര്‍, വഖ്ഫ് ബോര്‍ഡ് അംഗം നാസിഹ് മുസ്‌ലിയാര്‍, എസ്.കെ.എസ്.എസ്.എഫ് ലക്ഷദ്വീപ് ജില്ലാ സെക്രട്ടറി അബ്ദുറഊഫ് യമാനി, വിഖായ ചെയര്‍മാന്‍ ഖാജാ റഹ്മാന്‍ ദാരിമി, കാംപസ് വിങ് കണ്‍വീനര്‍ നിയാസ്, യൂനിറ്റ് ട്രഷറര്‍ താഹാ തുടങ്ങിയ സംഘടനാ സാരഥികളും പ്രവര്‍ത്തകരും സംബന്ധിച്ചു.