പൂച്ചാക്കല്‍:കാണാതായ വിദ്യാര്‍ഥി നിസാമിന് എസ്.എസ്.എല്‍.സിക്ക് വിജയം.
സന്തോഷം പങ്കിടുവാന്‍ കഴിയാതെ മാതാപിതാക്കള്‍. പാണാവള്ളി പഞ്ചായത്ത് പതിനേഴാം വാര്‍ഡില്‍ തോട്ടത്തില്‍ നികര്‍ത്തില്‍ താജു  റാഹത്ത് ദമ്പതികളുടെ മകന്‍ നിസാമുദ്ദീനെയാണ് (15) ദുരൂഹ സാഹചര്യത്തില്‍ കാണാതായത്. കഴിഞ്ഞ മാസം എട്ടിന് തളിയാപറമ്പ് ക്ഷേത്രത്തിലെ ഉത്സവം കാണാന്‍ പോയ നിസാം പിന്നീട് തിരിച്ച് വന്നിട്ടില്ല.
അന്വേഷണത്തില്‍ ഇതുവരെ ഒരു തുമ്പും പൊലിസിന് ലഭിച്ചിട്ടില്ല. ബാംഗ്ലൂര്‍, മൂന്നാര്‍ എന്നിവിടങ്ങളില്‍ പോകാന്‍ ഇടയുണ്ടെന്ന അഭ്യൂഹത്തെ തുടര്‍ന്ന് പൊലിസ് അന്വേഷണം ആ നിലക്കാണ് നീങ്ങിയെങ്കിലും ഒരു വിവരവും ലഭിച്ചില്ല.
ഒരുമാസമായിട്ടും പൊലിസ് അന്വേഷണം കാര്യക്ഷമം ആകാത്തതിനാല്‍ ബന്ധുക്കളും പ്രദേശവാസികളും ചേര്‍ന്ന് ആക്ഷന്‍ കൗണ്‍സില്‍ രൂപവത്കരിച്ചു.ഉത്സവ ദിവസം നിസാം പിതൃസഹോദരപുത്രന്‍ ഇര്‍ഫാനുമായി സൈക്കിളില്‍ നാല്‍പത്തെണ്ണീശ്വരത്തുള്ള സുഹൃത്ത് കൃഷ്ണാനന്ദിന്റെ വീട്ടില്‍ ചെന്നു.  
ബയോമെട്രിക് ലോക്ക് സിസ്റ്റം ഉള്ള നിസാമിന്റെ ഫോണ്‍  ഏല്‍പിച്ച് ഇര്‍ഫാനെ പുറത്ത് നിര്‍ത്തിയ ശേഷമാണ് നിസാമുദ്ദീന്‍ കൃഷ്ണാനന്ദിന്റെ വീട്ടിലേക്ക് കയറിപ്പോയത്.  പിന്നീട് നിസാമിനെ ആരും കണ്ടിട്ടില്ല. കൃഷ്ണാനന്ദിവിന്റെ വീട്ടില്‍ നിസാമിനെ അന്വേഷിച്ച് ചെന്ന ഇര്‍ഫാനോട് വീടിന്റെ പിന്‍ഭാഗത്തു കൂടി നിസാം പോയെന്നാണത്രെ പറഞ്ഞത്.  ഇവിടം കേന്ദ്രീകരിച്ച്  പൊലിസ് വേണ്ട രീതിയില്‍ അന്വേഷണം നടത്തിയിട്ടില്ലെന്ന് ആക്ഷേപമുണ്ട്.