തരുവണ: തരുവണയില്‍ ഇരുചക്ര വാഹനങ്ങളുടെ അനധികൃത പാര്‍ക്കിങ് യാത്രക്കാര്‍ക്കും വാഹനങ്ങള്‍ക്കും ദുരിതമാകുന്നു. നോ പാര്‍ക്കിങ് ബോര്‍ഡ് ഉണ്ടായിട്ടും ഇരുചക്ര വാഹനങ്ങള്‍ ബസ് സ്റ്റാന്‍ഡ് കൈയടക്കിയിരിക്കുകയാണ്.
 ഇതോടെ ബസുകള്‍ക്ക് സ്റ്റാന്‍ഡില്‍ യാത്രക്കാരെ കയറ്റാനും ഇറക്കാനും കഴിയാത്ത സ്ഥിതിയാണ്. വര്‍ഷങ്ങളായി സ്റ്റാന്‍ഡില്‍ സ്വകാര്യ വാഹനങ്ങള്‍ പാര്‍ക്ക് ചെയ്യുന്നുണ്ടെങ്കിലും അധികൃതര്‍ ഇതുവരെ നടപടിയെടുത്തിട്ടില്ലെന്ന് ആരോപണമുണ്ട്. രാവിലെ സ്റ്റാന്‍ഡില്‍ പാര്‍ക്ക് ചെയ്യുന്ന വാഹനം വൈകിട്ടാണ് മാറ്റുന്നത്.
ബന്ധപ്പെട്ട അധികൃതര്‍ വേണ്ടത്ര ശ്രദ്ധപാലിക്കാത്തതാണ് ഇരു ചക്ര വാഹനങ്ങളുടെ ഈ കടന്നു കയറ്റത്തിന് കാരണം. തരുവണ ഹൈസ്‌കൂള്‍ വേനലവധിക്ക് പൂട്ടിയതോടെ പൊലിസും ടൗണില്‍ ഡ്യൂട്ടിക്കെത്താതായി. വെള്ളമുണ്ട പൊലിസ് അധികൃതര്‍ ശ്രദ്ധിച്ചാല്‍ ഇതിന് പരിഹാരമാവുമെന്നും നാട്ടുകാര്‍ പറയുന്നു.
തരുവണയിലെ പി മൊയ്തു ഹാജിയുടെ കുടുംബം നിര്‍മിച്ചതാണ് ഇവിടുത്തെ ബസ് സ്റ്റാന്‍ഡ്. തുടക്കത്തില്‍ പത്രം, ടി.വി, വെള്ളം എന്നിവ യാത്രക്കാരുടെ സൗകര്യത്തിനായി ഒരുക്കിയിരുന്നു. എന്നാല്‍ കുടിവെള്ളം മാത്രമേ നിലവിലുള്ളൂ.