പൂച്ചാക്കല്‍: പൊലിസിനെ അക്രമിച്ച മദ്യപസംഘത്തെ റിമാന്‍ഡ് ചെയ്തു. പാണാവള്ളി പഞ്ചായത്ത് ഏഴാം വാര്‍ഡില്‍ ചക്കുപുരയ്ക്കല്‍ സിനോജ് മാത്യു (31), ഇയാളുടെ സഹോദരന്‍ സിറോജ് മാത്യു (33), പാണാവള്ളി പഞ്ചായത്ത് ഏഴാം വാര്‍ഡില്‍ മാട്ടേല്‍പുതുവല്‍ സജീവ് (31) എന്നിവരെയാണ് പൊലിസ് അറസ്റ്റ് ചെയ്തത്. ഇവരെ ചേര്‍ത്തല കോടതി റിമാന്‍ഡ് ചെയ്തു.
മദ്യപിച്ച് റോഡില്‍ ബഹളം വെച്ചവരെ പിടികൂടാന്‍ ചെന്ന പൊലിസിനെ ഇവര്‍ അക്രമിക്കുകയായിരുന്നെന്ന് പൊലിസ് പറഞ്ഞു. പൂച്ചാക്കലില്‍ മദ്യപിച്ച് ബഹളം വച്ചവരെ പൊലിസെത്തി ജിപ്പില്‍ കയറ്റിക്കൊണ്ടുപോകാന്‍ ശ്രമിച്ചപ്പോഴാണ് പൊലിസിനു നേരെ ഇവര്‍ തിരിഞ്ഞത്. ഞായറാഴ്ച രാത്രിയിലായിരുന്നു സംഭവം. പൂച്ചാക്കല്‍ പൊലിസ് സ്റ്റേഷനിലെ എ.എസ്.ഐ രാധാകൃഷ്ണന്‍, സീനിയര്‍ സിവില്‍ പൊലിസ് ഓഫിസര്‍ രാജേന്ദ്രന്‍, സിവില്‍ പൊലിസ് ഓഫിസര്‍മാരായ മനു, സിനോ, ശ്രീകുമാര്‍ എന്നിവര്‍ക്കാണ് മര്‍ദനമേറ്റത്.
ഇവര്‍ തുറവൂര്‍ താലൂക്ക് ആശുപത്രിയില്‍ ചികില്‍സ തേടി. കൃത്യനിര്‍വഹണത്തിനിടയില്‍ പൊലിസിനെ അക്രമിച്ചതിനാണ് ഇവര്‍ക്കെതിരെ കേസ്. സ്റ്റേഷനിലെ ചില കസേരകളും കംപ്യൂട്ടര്‍ മോനിട്ടറും നശിപ്പിച്ചത് സംബന്ധിച്ചും കേസെടുത്തിട്ടുണ്ട്.