നെടുമ്പാശ്ശേരി: കനത്ത പ്രളയത്തിന് ശേഷം സംസ്ഥാനത്തിന്റെ വിവിധ ഭാഗങ്ങളില്‍ എലിപ്പനി പടര്‍ന്നു പിടിക്കുന്ന സാഹചര്യത്തില്‍ നെടുമ്പാശ്ശേരി മേഖലയിലെ പഞ്ചായത്തുകളും ആശങ്കയുടെ വക്കിലാണ്.
ജില്ലയില്‍ പ്രളയം ഏറ്റവും കൂടുതല്‍ ബാധിച്ച പ്രദേശങ്ങളില്‍ ഒന്നാണ് ഇത്. കുന്നുകര ഗ്രാമപഞ്ചായത്തിനെയാണ് മേഖലയില്‍ പ്രളയം ഏറ്റവും ഗൗരവമായി ബാധിച്ചത്.ഇവിടെ ജനജീവിതം സാധാരണ നിലയിലേക്ക് മടക്കിക്കൊണ്ടുവരാനുള്ള ശ്രമങ്ങള്‍ തുടരുകയാണ്.ഇതിനിടെ എലിപ്പനിയുടെ ലക്ഷണങ്ങളുമായി ചികില്‍സ തേടിയിട്ടുള്ള രണ്ട് പേരില്‍ ഒരാള്‍ക്ക് എലിപ്പനി സ്ഥിതീകരിച്ചത് ചെറിയ തോതില്‍ ആശങ്ക പരത്തിയിട്ടുണ്ട്.
കുന്നുകര പഞ്ചായത്തിലെ 12,13 വാര്‍ഡുകളുടെ സംഗമ സ്ഥലമായ കാരക്കാതുരുത്തില്‍ നിന്നാണ് രണ്ട് പേര്‍ കളമശ്ശേരി മെഡിക്കല്‍ കോളേജ്, തൃശൂര്‍ മെഡിക്കല്‍ കോളേജ് എന്നിവിടങ്ങളിലായി ചികില്‍സ തേടിയിരിക്കുന്നത്.ഇതില്‍ കളമശ്ശേരി മെഡിക്കല്‍ കോളജില്‍ ചികില്‍സയിലുള്ള വയല്‍കര കരക്കാതുരുത്തില്‍ വേലായുധനാണ് എലിപ്പനി സ്ഥിതീകരിച്ചത്.
തൃശൂര്‍ മെഡിക്കല്‍ കോളേജില്‍ പ്രവേശിപ്പിച്ചിട്ടുള്ള രഘുവിന്റെ രക്ത പരിശോധനാ റിപ്പോര്‍ട്ട് ലഭ്യമായിട്ടില്ലെങ്കിലും ഡോക്ടര്‍മാരുടെ ശക്തമായ നിരീക്ഷണത്തിലാണ് ഇദ്ദേഹം.
എലിപ്പനിയുടെ അണുക്കള്‍ ശരീരത്തില്‍ പ്രവേശിച്ചാല്‍ അഞ്ച് മുതല്‍ ഇരുപത് ദിവസങ്ങള്‍ വരെ രോഗലക്ഷണങ്ങള്‍ പ്രകടമാകാതെയിരിക്കാനും സാധ്യതയുണ്ട്. ചെങ്ങമനാട് മൂന്നുപേര്‍ നിരീക്ഷണത്തിലാണ്.