കോഴിക്കോട്: നിപായും പ്രളയവും വിതച്ച ദുരന്തത്തില്‍ നിന്ന് കരകയറുന്നതിനിടെ വന്ന എലിപ്പനിയെ പ്രതിരോധിക്കാന്‍ ആരോഗ്യവകുപ്പ്. ജില്ലയെ തുടര്‍ച്ചയായി പന്തുടരുന്ന ദുരിതം കുറച്ചൊന്നുമല്ല ജനത്തെ ബാധിക്കുന്നത്. നിപയെയും പ്രളയത്തെയും അതിജയിച്ച് എലിപ്പനിയെയും അതിജയിക്കാനുള്ള അതീവ ജാഗ്രതയിലാണ് ആരോഗ്യവകുപ്പ്.
എലിപ്പനി ബാധിച്ച് അഞ്ചുദിവസത്തിനിടെ ജില്ലയില്‍ മാത്രം മരിച്ചവരുടെ എണ്ണം 19 ആയി. ജില്ലയ്ക്കകത്തുനിന്നും സമീപജില്ലകളില്‍ നിന്നും നിരവധി പേരാണ് കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സ തേടിയെത്തുന്നത്. എലിപ്പനി പടര്‍ന്നുപിടിക്കുന്ന ഈ സാഹചര്യത്തില്‍ തീവ്രമായ പ്രതിരോധ പ്രവര്‍ത്തനമാണ് ആരോഗ്യവകുപ്പ് നടത്തുന്നത്.
പ്രതിരോധ മരുന്നായ ഡോക്‌സിസൈക്ലിന്‍ വിതരണം കൂടുതല്‍ വ്യാപിപ്പിക്കാനാണു തീരുമാനം. പ്രതിരോധ മരുന്ന് കഴിക്കാത്തത് രോഗം വ്യാപിക്കാന്‍ കാരണമായെന്ന് വിദഗ്ധര്‍ പറയുന്നു. പലരും സ്വയം ചികിത്സിച്ചതും മരണത്തിന്റെ തോതു ഗണ്യമായി വര്‍ധിക്കാന്‍ കാരണമായി.
അതേസമയം ജില്ലയില്‍ ഇന്നു ഒരാള്‍ക്കുകൂടി എലിപ്പനി സ്ഥിരീകരിച്ചു. കോര്‍പറേഷന്‍ പരിധിയിലെ നാലുകുടിപ്പറമ്പിലാണ് എലിപ്പനി സ്ഥിരീകരിച്ചത്. ഇതോടെ സ്ഥിരീകരിച്ച കേസുകള്‍ 105 ആയി. വെള്ളിപറമ്പ് (2), പൂവാട്ട്പറമ്പ് (2), വടകര, ചേവരമ്പലം, നല്ലളം, പുതുപ്പണം (2), മേരിക്കുന്ന്, വെങ്ങളം, പുതിയറ, മാവൂര്‍, പെരിങ്ങളം, എന്നിവിടങ്ങളായി 14 സംശയാസ്പദമായ കേസുകള്‍ കൂടി റിപ്പോര്‍ട്ട് ചെയ്തിട്ടുണ്ട്. ഇതോടെ സംശയാസ്പദമായ കേസുകളുടെ എണ്ണം 223 ആയി.
എലിപ്പനിക്കു പുറമെ മറ്റു പകര്‍ച്ചവ്യാധികളായ ഡെങ്കിപ്പനി, മഞ്ഞപ്പിത്തം, കോളറ എന്നിവയും പകരാനുള്ള സാഹചര്യം നിലവിലുണ്ട്.

പിടിച്ചുകെട്ടാം നമുക്ക് ഒരുമയോടെ

കോഴിക്കോട്: പകര്‍ച്ചവ്യാധികള്‍ വ്യാപകമായ സാഹചര്യത്തില്‍ കൂടുതല്‍ കരുതല്‍ നടപടികളുമായി ആരോഗ്യവകുപ്പ്.
നിലവില്‍ കാക്കൂര്‍, ചെറുവണ്ണൂര്‍, ബേപ്പൂര്‍, ചക്കിട്ടപാറ, ചൂലൂര്‍, കക്കോടി, കുണ്ടുതോട്, കുന്ദമംഗലം, മൂഴിക്കല്‍, പെരുവയല്‍, പുതുപ്പാടി, തണ്ണീര്‍പന്തല്‍, വാണിമേല്‍, മരുതോങ്കര, വേളം, തിരുവമ്പാടി തുടങ്ങിയ പ്രദേശങ്ങളില്‍ താല്‍ക്കാലിക ആശുപത്രികള്‍ ആരോഗ്യവകുപ്പിന്റെ മേല്‍നോട്ടത്തില്‍ പ്രവര്‍ത്തനം ആരംഭിച്ചിട്ടുണ്ട്. കൂടാതെ 82 ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരുടെയും സേവനം ലഭ്യമാണ്.
എല്ലാ പ്രൈമറി ഹെല്‍ത്ത് സെന്ററുകളിലൂടെയും പ്രതിരോധ മരുന്ന് വിതരണവും ഉണ്ട്. ജനങ്ങളുടെ സംശയനിവാരണത്തിനായി 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂമും ജില്ലാ മെഡിക്കല്‍ ഓഫിസില്‍ തുറന്നിട്ടുമുണ്ട്. ഭീതിയെ ഒഴിവാക്കി രോഗത്തെ പ്രതിരോധിക്കാനാണ് നാമിപ്പോള്‍ ശ്രദ്ധിക്കേണ്ടത്.
എലികള്‍ പെരുകാനുള്ള സാഹചര്യം ഒഴിവാക്കുക. ആരോഗ്യ പ്രവര്‍ത്തകരുടെ നിര്‍ദേശങ്ങള്‍ അനുസരിക്കുക. കൂട്ടായ പരിശ്രമത്തിലൂടെ എലിപ്പനിയെയും നമുക്ക് പിടിച്ചുകെട്ടാം.