കോട്ടക്കല്‍: എസ്.എസ്.എല്‍.സി പരീക്ഷയില്‍ കൂടുതല്‍ കുട്ടികളെ പരീക്ഷക്കിരുത്തി സംസ്ഥാനത്ത് കൂടുതല്‍ എ പ്ലസ് നേടിയ സ്‌കൂളെന്ന വിശേഷണം ഇത്തവണയും എടരിക്കോട് പി.കെ.എം.എച്ച്.എസ്.എസിന്.
കഴിഞ്ഞ നാല് വര്‍ഷമായി ഈ ബഹുമതി എടരിക്കോടിനു തന്നെയാണ്. 2225 കുട്ടികളാണ് ഈ വര്‍ഷം ആകെ പരീക്ഷ എഴുതിയത്. ഇവരില്‍ 2225 കുട്ടികളെയും വിജയിപ്പിച്ച് റെക്കോര്‍ഡിന്റെ മാറ്റ് കൂട്ടി. 186 കുട്ടികള്‍ മുഴുവന്‍ വിഷയങ്ങളിലും എ പ്ലസ് നേടി. ഒന്‍പത് വിഷയങ്ങളില്‍ 201 പേര്‍ എ പ്ലസ് നേടി. കഴിഞ്ഞ വര്‍ഷം 2347 വിദ്യാര്‍ഥികള്‍ പരീക്ഷ എഴുതിയിരുന്നു. പിന്നോക്കക്കാരായ കുട്ടികള്‍ക്ക് പ്രത്യേകം പരിശീലനം നല്‍കിയും അധ്യാപകര്‍ അധികജോലി ചെയ്തുമാണ് വലിയ വിജയം നേടാന്‍ സഹായിച്ചത്.
സ്‌കൂള്‍ മൈതാനത്ത് സംഘടിപ്പിച്ച അനുമോദന ചടങ്ങ് മാനേജര്‍ ബഷീര്‍ എടരിക്കോട് ഉദ്ഘാടനം ചെയ്തു. കെ.പി അബ്ദുറഹ്മാന്‍ അധ്യക്ഷനായി. പ്രിന്‍സിപ്പല്‍ കെ മുഹമ്മദ് ഷാഫി, പ്രധാനാധ്യാപിക എസ് ഖദീജാബി, സ്റ്റാഫ് സെക്രട്ടറി കെ.പി നാസര്‍, പ്രമോദ് വാഴങ്കര, ടി മജീദ് എന്നിവര്‍ സംസാരിച്ചു.