മലപ്പുറം: തീവ്രവാദ സംഘടനകളായ ഇസ്‌ലാമിക് സ്റ്റേറ്റ്‌സിനേയും ജെയ്‌ഷെ മുഹമ്മദിനേയും പിന്തുണച്ച് പോസ്റ്റിട്ടയാള്‍ അറസ്റ്റില്‍. മഞ്ചേരി ആനക്കയം സ്വദേശി അസ്‌കറിനെയാണ് പൊലിസ് അറസ്റ്റ് ചെയ്തത്. ഇയാളെ മഞ്ചേരി കോടതി റിമാന്‍ഡ് ചെയ്തു.

ജെയ്‌ഷെ മുഹമ്മദ് തലവന്‍ മസൂദ് അക്തറിനെതിരെ ഇന്ത്യ ഉന്നയിക്കുന്നത് വ്യാജ ആരോപണങ്ങളാണെന്ന് ഇയാള്‍ ഫേസ്ബുക്കില്‍ കുറിപ്പിട്ടിരുന്നുവെന്നാണ് പരാതി. ഇസ്‌ലാമിക് സ്റ്റേറ്റ്‌സിന്റെ പേരില്‍ ഭീകരത കെട്ടിവച്ച് കേരളത്തില്‍ കേസെടുക്കുന്നത് ഫാസിസ്റ്റ് താത്പര്യം മൂലമാണെന്നും ഫേസ്ബുക്കിലെ കുറിപ്പില്‍ കണ്ടെത്തിയതായും പൊലിസ് പറയുന്നു.
ഇയാളെ കസ്റ്റഡിയില്‍ വാങ്ങി വിശദമായി ചോദ്യം ചെയ്യുമെന്നും പൊലിസ് അറിയിച്ചു.